Qazaly qalasyna Áıteke bı kenti qosylady
QAZALY. QazAqparat - Qyzylorda oblysynda Áıteke bı kenti men Qazaly qalasy bir eldi meken bolyp qosylady. Jańa eldi mekendi kógaldandyrý jáne abattandyrý jumystary oblys ákimi Qyrymbek Kósherbaevtyń qatysýymen Qazaly aýdanynda ótken kóshpeli májiliste talqylandy, dep habarlaıdy Qazaqparat tilshisi.
Aıta keteıik, osy jyldyń qańtar jáne aqpan aılarynda Áıteke bı jáne Qazaly kentin damytý máseleleri boıynsha jıyndar ótkizilgen bolatyn. Aýdan ákimi Murat Ergeshbaev atqarylǵan jumystar men buǵan deıin de ótkizilgen basqosýlarda berilgen tapsyrmalardyń oryndalýy týraly baıandady.
Infraqurylymmen qamtamasyz etilip jatqan kenttegi 180 gektar aımaqtan (Janqoja batyr kesenesi mańy) Rámizder alańy men Demalys parkin salý úshin 8,2 gektar jer ýchaskesi belgilendi. Demalys parkine aýyz sý, elektr jelisi men joly salynyp, abattandyrý jumystary júrgizilse, jańa úlgidegi attraktsıondar men oıyn alańdaryn salýǵa kásipkerlermen aldyn ala kelisim jasalǵan. Bul jańa úlgidegi saıabaq jergilikti halyqpen qatar, kórshiles Aral men Qarmaqshy aýdandarynyń turǵyndaryna da qyzmet kórsetetin bolady.
Aýdan ákiminiń aıtýynsha, bir kásipker jańa úlgidegi toıhana salýǵa ótinish bildirýde. Ótken aptada aýdandyq sáýlet keńesinde nobaılyq jobasy maquldandy. Budan basqa da kásipkerlik maqsatta jer ýchaskelerin alýǵa nıet bildirip otyrǵan azamattar jeterlik. Sondyqtan, jabyq bazar salý úshin eski áýejaı aýmaǵynan 2 gektar jer ýchaskesi belgilendi.
"Qazaqstan MJÁ ortalyǵy" AQ-men "Shaǵala" balalar tynyǵý lageriniń qurylysyn salýǵa kelisimge otyrdy, búginde ınvestorlar izdestirilýde. Budan bólek, 250 oryndyq aýdandyq aýrýhana, 12 ekiqabatty úıler jáne ózge de áleýmettik nysandar qurylysynyń jobalary ázirlendi. Ulttyq qaýipsizdik komıteti aýdandyq bóliminiń keńse ǵımaraty men aýdandyq orman jáne janýarlar dúnıesin qorǵaý mekemesi keńsesiniń qurylysy jobasy daıyndalýda. Al bıyl aýdandyq mekemeler úıi men mádenıet úıi qurylysyna oblystyq bıýdjetten qarjy bólingen. Búginde oblystyq qurylys, sáýlet jáne qala qurylysy basqarmasymen memlekettik satyp alý joldary sheshilýde» dedi aýdan əkimi.
Aýdannyń jańa ortalyǵynda Áıteke bıdiń eńseli eskertkishi de ornatylady.
Sondaı-aq, "Jasyl beldeý" jasaý úshin kent mańynan 14 myń kóshet otyrǵyzylyp, sýaratyn arnalar jasaldy. Buǵan qosa, Áıteke bı kentiniń 55 kóshesin ortasha jóndeýge 2,7 mlrd teńge bolatyn joba-smetalyq qujattary ázirlendi. Osydan 3 kósheni (Q.Erimbet, Jetes bı, Er Maǵzaman) ortasha jóndeýdi bastaýǵa oblystyq bıýdjetten 120 mln teńge bólindi. Al Qazaly qalasyndaǵy 10 kóshe monoqalalardy damytý baǵdarlamasyna sáıkes kezeń-kezeńimen sheshimin tappaq.
Aýdan ákimi sheshimin kútip turǵan birneshe máselelerdiń baryn da atap ótti. Ol Qazaly aýdanyndaǵy 49 kósheni gazdandyrý, "Aqkıiz" jáne "№165" kanaldaryn tazartý, kóshelerdi jóndeý jáne basqa da máseleler.
Óz kezeginde oblys ákimi basqarma basshylaryna qurylys jumystaryn qarjylandyrý jáne máselelerdiń tez sheshimin tabýy úshin birigip jumys jasaýlaryn, al aýdan ákimine atqarylǵan jumystardy turaqty túrde baqylaýda ustap, sapasyna kóńil bólýdi tapsyrdy.
