Qazaly aýdanynyń ákimi sý tapshylyǵyn kórip otyrǵan halyqtan keshirim surady
QAZALY. QazAqparat - Qazaly aýdanynyń halqyn aýyz sý tapshylyǵy alańdatýda. Osy másele aýdan ákimdiginiń daǵdarysqa qarsy shtab otyrysynda keńinen talqylandy, dep habarlaıdy QazAqparat tilshisi.
Qazaly aýdanynyń ákimi baspasóz qyzmetiniń habarlaýynsha, 13-15 shilde aralyǵynda «Qosaman» ýchaskesinde elektr toǵynyń ýaqytsha aǵytylyp, jetkizilýi qajet sý kólemi dalalyq jerge jaıylǵan. Sonymen qatar, Aral aýdanynyń «Aqbaı» eldi mekeni aýmaǵynan ótetin aýyz sý qubyrynan belgisiz sebeptermen turǵyndardyń maqsatsyz sý alýy saldarynan aýyz sý tapshylyǵy oryn alyp, qıyndyqtar týyndady. Onyń ústine, bıylǵy jyly jazǵy maýsymǵa oraı Qazaly aýdanda aýyz sýdy tutynýshy turǵyndar sanynyń, dálirek aıtsaq, 3 myń abonentke artýy da óz áserin tıgizgen.
«Aral-Sarybulaq toptyq sý qubyry» mekemesiniń málimetine súıensek, «Qosaman» ýchaskesinde jumys istep turǵan 14 skvajınadan táýligine 19 000 tekshe metr aýyz sý alynyp, Aral jáne Qazaly aýdandaryna taratylǵan.
«Tutynýshylarǵa táýligine berilgen aýyz sýdyń 7000-8200 tekshe metri Áıteke bı kentiniń úlesinde bolsa, Qazaly qalasyna 800 tekshe metr, eldi mekender boıynsha 2000 tekshe metr kóleminde aýyz sý berilip otyr. Naqty kezeńde aýa raıynyń salqyndaýyna baılanysty aýyz sýdyń tutyný kólemi tómendeýinen Áıteke bı kentinde №1 jańadan salynǵan sıymdylyǵy 14000 tekshe metrlik sý qoımasynda 3600 tekshe metr aýyz sý qory saqtalǵan. Qazirgi kezde aýyldyq eldi mekenderde de aýyz sýmen jabdyqtaý jaǵdaıy turaqtalyp keledi», - delingen aýdan ákimi baspasóz qyzmetiniń taratqan aqparatynda.
Sonymen qatar, baspasóz qyzmetiniń málimetinshe, negizinen, aýyz sýdyń tutyný kóleminiń artýynan jáne sý qubyry boıynda qysymnyń tómendeýinen «Melıorator» móltek aýdany úılerinde, Tóle bı, T.Bórqulaqov, Dáýletkereı, Saın, Ú.Túktibaev kóshelerinde sý aqpaýy sebepti avtokólikpen aýyz sý taratylyp keldi. Qazirgi tańda qysymy tómen kósheler boıyndaǵy kórý qudyqtaryna qaıta revızııa jasalyp, tazalaý jumystary atqarylyp, nátıjesinde halyqqa aýyz sý jetkizilýde.
Búgingi kúnge deıin Áıteke bı kentinde ornalasqan syıymdylyǵy 21000 tekshe metr sý qoımasyna óz dárejesinde aýyz sý kólemi saqtalmaǵan. Bul jaıly aýdan basshysy Murat Ergeshbaev jaýapty sala basshylarynan halyqqa aýyzsýdy irkilissiz berý úshin jyl basynan beri sý qory rezervýaryna aýyzsýdyń jetkilikti dárejede jınalmaý sebebin surady. Tipti, «osy ýaqytqa deıin sabyrlyq saqtap otyrǵan, aýyzsýdan taryqqan jurtshylyqtan sala basshylary atynan keshirim suraımyn» degen aýdan ákimi aldaǵy kezeńderde keleńsiz jaǵdaılardyń oryn almaýy úshin 21 myń tekshe metr sý qoımasyndaǵy aýyzsý qoryn molaıtyp, aýyz sý júıelerin udaıy baqylaýǵa alýdy, turǵyndardy aýyz sýmen turaqty túrde qamtamasyz etýge baǵyttalǵan jumystardy jalǵastyrýdy, tapsyrmanyń oryndalýyn qatań qadaǵalaýdy tapsyrdy.
