Qazaly aýdanynda júgeri jańbyrlatyp sýarý ádisimen egilgen
Bıyl Syrdarııa ózenindegi sý tapshylyǵy men qýańshylyqqa baılanysty oblystaǵy birqatar sharýashylyqtar sý únemdeý tehnologııasyn qoldanýǵa kóshti. Solardyń biri – Qazaly aýdanyndaǵy «RZA» aaktsıonerlik qoǵamy.
Elimizge belgili azamat Samurat Imandosov basshylyq jasaıtyn kompanııa bıyl 87 gektar jerge jańbyrlatyp sýarý arqyly súrlemdik júgeri daqylyn ekti. Tyń ádisti qoldanysqa engizýdegi basty maqsat – sońǵy úlgidegi sý únemdeý tehnologııasynyń kómegimen qunarly mal azyǵyn daıyndaý.
Jobanyń jalpy quny - 600 mln teńge. Joba aıasynda 2019-2020 jyldary 87 gektar aýmaqqa jerasty drenajdy júıesi júrgizildi. Qorshaý ornatylyp, sorǵylar qoıyldy. Byltyr qajetti qural-jabdyqtar satyp alyndy. Sonyń negizgisi - ıspandyq kompanııanyń jańbyrlatyp sýarý qondyrǵysy.
Odan bólek, taǵy bir qazalylyq azamat, Áıteke bı kentiniń turǵyny Nurlybek Nurqojaev óz kúshimen Ǵ.Muratbaev aýyldyq okrýginen tamshylatyp sýarý ádisimen qarbyz ben qııar egip, mol ónim aldy.
