Qazaly aýdanynda jas aqyndar aıtysy ótti
Aıtysty ótkizýge aýdandyq ishki saıasat bólimi, Qazaly aýdandyq Janqoja batyr meshitine qarasty Qoja Orynbet Ishan meshiti muryndyq bolǵan. Sondaı-aq, aýyldan shyqqan kásipker Jetes Ydyrysuly demeýshilik kórsetken.
- Elimizdegi aıtys óneriniń óristeýine Syr aqyndary da úles qosyp keledi. Alysqa barmaı-aq, Muhtar Nııazov, Nurmat Mansurov, Meıirbek Sultanhan esimdi jerlesterimiz «búgingi aıtystyń arlany, Júrsinniń júırikteri» desem artyq aıtqan emes. Osyndaı aǵalarynyń jolyn qýyp, izin jalǵap kele jatqan jetkinshekter qasıetti Qazaly topyraǵynda da ósip keledi. Qazalylyq órenderimizdiń ulttyq ónerge, onyń ishinde aıtys ónerine jaqyndyǵy qýantady, - dedi aýdandyq máslıhat hatshysy Kúntiles Aıdarbekuly aıtystyń ashylý saltanatynda.
Sóz dodasyna 12 jas aqyn qatysty. Nátıjesinde Bas júlde Qojabaqy aýylynan kelgen jas daryn Amangeldi Toqtarbekke buıyrdy. І orynǵa maıdakóldik Ábdihan Bekzat laıyq dep tanylsa, ІІ oryndy da maıdakóldik Serikov Bekzat enshiledi. Al ІІІ orynǵa taǵy bir maıdakóldik aqyn 7-synyp oqýshysy Esebaı Ómirtaı ıe boldy.
