Qazaly aýdanynda óńir basshysynyń qatysýymen shaǵyn jáne orta bıznesti damytý máseleleri qaraldy
QYZYLORDA.QazAqparat -Búgin Qazaly aýdanynda oblys ákimi Qyrymbek Kósherbaevtyń tóraǵalyǵymen májilis ótti. Májiliste kásipkerlikti damytý jáne halyqty jumyspen qamtý máseleleri jan-jaqty talqylandy, dep habarlady QazAqparat HAA tilshisi Qazaly aýdandyq ákimdigine silteme jasap.
Aýdan ákimi Najmadın Shamuratov iske asqan jobalarmen qatar aldaǵy josparlar týraly baıandady. Aýdan boıynsha shaǵyn kásipkerlik sýbektileriniń sany 4173 birlikti qurap, ótken jyldyń tıisti kezeńimen salystyrǵanda 5,1 paıyzǵa artqan. Onda jumyspen qamtylǵan adamdar sany - 8819.
«Bıznestiń jol kartasy-2020» baǵdarlamasy aıasynda ótken jyly quny 235,9 mln teńge quraıtyn 9 joba iske asyrylsa, osy jyldyń ózinde 141,9 mln teńge quraıtyn 4 joba qarjylandyryldy.
Aýdanda halyqty baý-baqsha egýge tartý jumystary júrgizilýde. Jergilikti bılik tarapynan júrgizilgen kelissózderdiń nátıjesinde baý-baqsha ónimderi bıylǵy jyldan bastap Máskeý qalasyna, Aqtóbe, Ońtústik Qazaqstan oblystary men Baıqońyr qalalaryna eksporttalatyn bolady.
Bul jumystar aýdanda ótken jyly bastalǵan. «AgroOptServıs» JShS-niń dırektory Bekbolat Bıbalaev 420 tonna baqsha ónimderin Aqtóbe qalasynyń saýda ortalyqtaryna jetkizip, halyqtyń oń yqylasyna bólendi.
Aýdanda 26 aýyl sharýashylyǵy kooperatıvi quryldy. Qazirgi tańda mal sharýashylyǵyn damytý, bordaqylaý alańdaryn uıymdastyrý, et-sút ónimderin óndirýmen qatar jemis-jıdek, kókónis, baqsha ónimderin óńdeý baǵytyndaǵy jumystar qolǵa alynýda.
Máselen, qyzanaq, qııar, asqabaq, qarbyz, kartop, askók tuqymdaryn Aqjona aýyldyq okrýgine qarasty «Maıdakól» óndiristik kooperatıvi satyp aldy. Kooperatıv tóraǵasy Áset Dúzbaev 70 ga jerdiń 50 gektaryna qaýyn-qarbyz túrlerin, qalǵan 20 gektaryna kókónister egetin bolady. Onyń ishinde askókti ósirip, daıyn túrde qaptap satý maqsatynda tseh ashýdy josparlap otyr. Jáne aldaǵy ýaqytta jylyjaı salýǵa da jumys jasaýda.
Májilis sońynda oblys ákimi aıtylǵan usynys-pikirlerdi qorytyndylap, ákimder men sala basshylaryna tıisti tapsyrmalar berdi.
