Qazaly aýdanynda eki jańa mektep ashyldy

Bul týraly QazAqparat tilshisi aýdandyq ákimdikke silteme jasap habarlady.

 Onyń biri Maıdakól aýylyndaǵy 200 oryndyq №98 mektep. 183 oqýshy bilim alatyn bilim ordasy sport zal, medıtsınalyq bólme, 80 oryndyq ashana, 120 oryndyq májilis zalymen qamtylǵan. Mekteptiń ashylý rásiminde R.Rústemov barsha oqýshylardy jańa ǵımarattyń ashylýymen quttyqtap, sáttilik tiledi. Aýyldyq áıelder keńesiniń tóraıymy Kúlásh Leker jańa mekteptiń salynǵanyna turǵyndardyń erekshe qýanyshty ekendigin jetkizip, alǵysyn bildirdi. 11 klass oqýshysy Sharhan Muhammed-Qanapııa arnaý óleńin oqydy.
 

 Taǵy bir jańa mektep Shıli aýylynda ashyldy. Munda 50 oryndyq  mektep 20 oryndyq balabaqshasymen el ıgiligine berildi. Mektep zamanaýı oqý quraldarymen jabdyqtalyp, balalardyń sapaly bilim alýyna barlyq jaǵdaı jasalǵan. Ardager ustaz Qýanysh Ysmaǵul shalǵaı aýyldan osyndaı záýlim mekteptiń salynǵanyna rızashylyǵyn bildirdi. Qonaqtar lıngafon kabınetindegi balalardyń aǵylshyn tilin úırený dárisin kórip, oqýshylarǵa sáttilik tiledi.
 

 Budan bólek, qonaqtar Q.Sátbaev atyndaǵy №216 orta mektep janynan júrgizilgen qosymsha qurylyspen tanysty. Jańa korpýsta sport zal, ashana, er jáne qyz balalarǵa arnalǵan sheberhana ornalasqan. Qurylys jumystary oblystyq bıýdjetten bólingen 194,0 mln teńgege atqarylǵan.

 Aıta keteıik, osydan úsh jyl buryn Qazaly aýdanynda apattyq jaǵdaıdaǵy mektepter sany 9 bolsa, 2016 jylǵa deıin 4 mektep, 3 balabaqsha qurylysy júrgizildi. Al ótken jyly sońǵy 5 apattyq jaǵdaıdaǵy mektepter qurylysy bastalyp, oqý jyly aıaqtalar tusta Birlik jáne Lahaly aýyldarynda paıdalanýǵa berildi. Búgin Maıdakól men Shıli aýyldarynyń halqy da jańa mekteptiń ashylý saltanatyna qatysty. Sháken aýylynda da mektep qurylysy júrgizilýde. Budan bólek, aýdan ortalyǵyndaǵy 5 kvartal aımaǵynan da 300 oryndyq mektep salynýda. Osymen, apattyq mektepterdiń problemasy Qazaly aýdanynda merziminen buryn tolyq sheshildi.

Jazǵy ýaqytta «Shaǵala» balalardy saýyqtyrý demalys ortalyǵynda 6 aýysym uıymdastyrylyp, ár aýysym boıynsha 140 baladan, barlyǵy 840 bala demaldy.

Mektep janyndaǵy kórkeıtý, kógaldandyrý jáne qurylys jasaqtaryna 2931 bala, Astana qalasyndaǵy «EKSPO-2017» kórmesine 774 bala, oblystan tys qalalarǵa saıahat jasaýǵa 3560 bala, aýla klýbtaryna, sport alańdaryna 2406-ǵa jýyq jasóspirim qamtyldy.

Aýdanda 36 bilim berý uıymynda barlyǵy 14 364 bala bilim alady. Olardyń 8739-y mektepishilik  sporttyq sektsııalar men túrli úıirmelerge qatysady. Sonymen qatar aýdandyq oqýshylar úıi, Qorqyt ata atyndaǵy balalar mýzyka mektebi men «Óner jáne sport» ortalyǵy syndy 3 qosymsha bilim berý uıymy jumys jasaıdy.

Ótken oqý jyly 11 synypty 713 oqýshy bitirip, 458 oqýshy ulttyq biryńǵaı testileýge qatysty. Qatysý paıyzy 64,2. Ortasha ball 88,1-di qurap, nátıjesinde oblys boıynsha Qazaly aýdany kósh bastady. «Altyn belgi» belgisin 57 oqýshy, úzdik attestatty 7 oqýshy  ıelendi. Testileýge qatysqan 458 túlektiń 319-y joǵary oqý oryndarynyń grantyn jeńip aldy.