Qazaly aýdanynda 3 aýylǵa tabıǵı gaz jetkizilip, balabaqsha ashyldy
Qazaly aýdanynyń Basyqara, Q.Pirimov, Jalańtós batyr aýyldaryna kógildir otyn júrgizildi. Aımaq basshysy aýyl turǵyndaryn quttyqtap, qazirgi tańda oblys halqynyń birinshi kezekte sheshýdi qajet etetin máselelerge, sonyń ishinde, ınjenerlik-ınfraqurylymdardy damytýǵa negizgi basymdyq beriletinin atap ótti.
«Búgin Qazaly aýdanyndaǵy Basyqara, Q.Pirimov jáne Jalańtós batyr aýylynyń turǵyndary úshin óte qýanyshty kún: sáýir aıynda bastalǵan gazdandyrý jumystary búgingi kúni tolyq aıaqtaldy. Endi 5 myńnan astam turǵyn men 23 mekeme-kásiporyn kógildir otynnyń ıgiligin kórmek. Taǵy da kóptegen kásipkerlik nysan tabıǵı gazben qamtamasyz etiledi. Biz múmkindiginshe barlyq aýyldy gazben qamtýǵa jumys jasaýdamyz. 2025 jylǵa deıin kógilder otynmen qamtylǵan aýyldar sanyn 70-ke deıin jetkizý josparymyzda bar. Kelesi jyly Qazaly aýdanyndaǵy Abaı aýylyn da gazdandyrý josparlanýda. Eldi mekenderge jetken kógildir otyn otbasynyń jylýyn, otanymyzdyń qýatyn arttyra tússin!», - dedi oblys ákimi.
Qoǵam qaıratkeri, Qazaly aýdanynyń Qurmetti azamaty Aıtbaı Kósherbaıuly aýdan turǵyndaryn kópten beri kútken qýanyshty jańalyqtarymen quttyqtap, aımaq basshysyna alǵys bildirdi. Sondaı-aq, eńbek ardageri, aýdandyq ardagerler keńesiniń tóraǵasy Orazǵalı Bekbanov jınalǵan qaýymǵa bata berdi.
Eldi mekenderge tabıǵı gaz qosylǵan soń oblys ákimi aýyl turǵyny Q.Pirimov aýylynyń turǵyny Serikbaı Quralaıdyń úıine baryp, kógildir gaz otynynyń berilý sátiniń kýási boldy.
- Sizderge kóp rahmet. Osy ýaqytqa deıin jyl saıyn tonnalap kómir satyp alatynbyz, ot jaǵyp, kúl shyǵarýmen boldyq. Endi, mine, bul beınetten qutyldyq, úıimiz da jylydy. Qýanyshymyzǵa shek joq, - deıdi úı ıesi.
Aıta keteıik, kógildir otynǵa qosylǵan 3 aýylda 4400 jýyq adam turady, joba nátıjesinde 750 jýyq turǵyn úı men 26 áleýmettik nysan gazdandyrylmaq.
Búgingi kúni oblysta gazdandyrý deńgeıi 68 paıyzdy quraıdy. Kelesi jyly quny 12 mlrd.teńgeni quraıtyn 15 jobany iske asyrý josparlanýda. Nátıjesimen oblys halqyn gazben qamtamasyz etý úlesi 72 paıyzǵa jetkizilmek.
Odan keıin óńir basshysy Nurlybek Nálibaev Qazaly qalasynda 140 oryndyq «Órimtal» balabaqshasynyń ashylý saltanatyna qatysty. Oblys ákimi qala turǵyndaryn quttyqtap, bıyl Qyzylorda oblysynyń damýyna aýqymdy ınvestıtsııalar tartylyp, kóptegen áleýmettik nysandar salynǵanyn atap ótti.
«Prezıdentimiz Qasym-Jomart Kemeluly Toqaevtyń qoldaýymen memleketimizdiń tiregi, ulttyń bolashaǵy – balalarymyzdyń ósip, oqyp, bilim alýy, azamat bolyp, qalyptasýy úshi jaǵdaıdyń barlyǵy jasalǵan.
Jańa jyl merekesi qarsańynda Qazalyda bal bóbekterimizge syı retinde 140 oryndyq «Órimtal» bóbekjaı balabaqshasyn paıdalanýǵa bermekpiz. Qazirgi tańda Qazaly aýdany boıynsha 31 balabaqsha, 19 shaǵyn ortalyq, barlyǵy 50 mektepke deıingi uıym bar. Byltyr Bekarystan bı aýylynan 100 oryndyq jeke balabaqsha ashyldy. Jyldan-jylǵa balabaqsha sanynyń kóbeıýi halqymyzdyń demografııalyq ósiminiń artýyn kórsetse kerek.
Bul ómirde baldaı tátti balǵyndarymyzdyń júzi jaınap, bar yqylasymen rıza bolǵanyn kórýden asqan baqyt joq. Barlyq qurmetimiz de osylarǵa arnalady», - dedi aımaq basshysy.
Іs-shara barysynda memleket jáne qoǵam qaıratkeri, QR Parlamenti Senatynyń depýtaty Murat Baqtııaruly lebizin bildirip, jerlesterin jańa bilim ordasynyń ashylýymen quttyqtady. Al, eńbek ardageri Serik Qýanyshbaıuly oblys ákimine rızashylyǵyn bildirip, aq batasyn berdi.
Ekiqabatty balabaqsha ǵımaratynyń jalpy aýmaǵy – 3 myńnan astam sh.m., munda 38 adam jumyspen qamtylǵan. Bilim uıasynda robototehnıka, án, bı, qolóner úıirmeleri ashylyp, ishi tolyqtaı zamanaýı qural-jabdyqtarmen qamtamasyz etilgen.
Jyl kóleminde balalarǵa arnalǵan nysandar legi iske qosyldy. Olardyń qatarynda 1 326 orynǵa arnalǵan 17 jekemenshik balabaqsha, 200 oryndyq Oqýshylar úıi men 50 oryndyq Óner mektebi bar.
Óńirde «Balalar jylynda» demeýshilerdiń qoldaýymen quny 1,6 mlrd.teńgeni quraıtyn 80 sport-oıyn alańdary tartý etildi.
«Jaıly mektep» Ulttyq jobasy aıasynda aldaǵy úsh jylda 15 100 orynǵa arnalǵan quny 100 mlrd teńgeden asatyn 21 mekteptiń qurylysy júrgiziledi.
Kelesi jyly 19,6 mlrd. teńgege, 10 mekteptiń qurylysy bastalady.
Ári qaraı aımaq basshysy «Qazaly-Temirjoljylý» MKK jumysymen tanysty. Kásiporyn Áıteke bı kentindegi 100-ge jýyq mekeme men 74 kópqabatty jáne 194 jeke turǵyn úıdi jylýmen qamtamasyz etedi. Nysan qalypty jumys isteýde, munda 3 negizgi jáne 1 rezervtik qazandyq bar.
Oblys ákimi nysannyń jumysyn zerdelep, aýdan ákimine jylý maýsymy tıisti deńgeıde ótýin jáne qajetti otyn qorynyń jetkilikti mólsherde bolýyn qadaǵalaýdy tapsyrdy.
