Qazaly aýdanynan 10 770 azamat maıdanǵa attanǵan-Qyzylorda

QYZYLORDA. QazAqparat - Qazaly aýdanynyń ákimi Najmadın Shamuratov Uly Otan soǵysy ardagerleriniń úılerine baryp Jeńis kúnimen quttyqtady. Bul týraly QazAqparat HAA tilshisi aýdandyq ákimdikke silteme jasap habarlady.

Qazaly qalasynda turatyn soǵys ardageri Qalep Bekturǵanovqa oblys ákiminiń quttyqtaý hatyn berip, merekelik syılyqtar tabys etti. Maıdannan eki jerden jaraqattanyp, elge oralǵan ardager búginde 8 ul-qyzynan 22 nemere men 23 shóbere súıip otyr.

 

Aýdan ákimi Najmadın Shamuratov jeńisti jaqyndatýǵa óz úlesin qosqan qart maıdanger, Bekarystan bı aýylynyń turǵyny Qabaq Smaǵuldyń da otbasynda boldy. Ardagerdi Jeńis kúni merekesimen quttyqtap, syı-sııapat kórsetti.

19 jasynda soǵysqa attanǵan Qabaq aqsaqal Moskva baǵytyndaǵy Týla qalasynyń mańynda nemis fashısterine qarsy shabýylǵa shyqqan. Q.Smaǵul kórsetken batyldyǵy úshin «Erligi úshin» medalimen, «Qyzyl juldyz», I jáne II dárejeli «Otan soǵysy» ordenderimen, «Uly Otan soǵysyndaǵy Jeńistiń 30, 40, 50, 60, 65, 70 jyldyǵy» medaldarymen marapattalǵan. Soǵys jáne eńbek ardageri soǵystan keıin elge oralǵannan bastap esep salasynda 40 jyl eńbek etedi.

Aýdan basshysy Káýkeı aýylynda turatyn soǵys ardageri Lepes Áýesbaevtyń da otbasyna boldy.

Aıta keteıik, Otandy qorǵaý úshin Qazaly aýdanynan 10 770 azamat maıdanǵa attansa, 6229 jaýynger ǵana aman-esen elge oralǵan. Olardyń jyl artqan saıyn qatary azaıyp, búgingi kúnde 5 ardager ǵana aramyzda júr.