Qazalyda respýblıkalyq at báıgesi qorytyndylandy
QYZYLORDA. KAZINFORM — Qyzylorda oblysy Qazaly aýdanynyń Aqtan batyr aýylynda Aqtan batyr Aqaıulynyń 255 jyldyq mereıtoıy aıasynda respýblıkalyq at báıgesi ótti. Aýdan ákimdiginiń baspasóz qyzmeti habarlaǵandaı, báıge taı jarysy, qunan báıge, oshaq báıge jáne alaman báıgeni qamtydy. Doda bastalmas buryn el aǵalary men ardagerler sóz sóıledi, atbegilerge aq batasyn berip, jarysqa sáttilik tiledi.
— Alǵashqy saıys — taı jarysy. 6 shaqyrymdyq qashyqtyqta 32 júıriktiń tuıaǵy dúbirledi. Bul synnan Jambyl oblysynyń shabandozy Damırdiń Zymyran atty tory taıy top jardy. Ekinshi oryndy Qarmaqshy aýdanynyń Dúr Ońǵar aýylynan kelgen Nurjan Shómekeıdiń Karamel atty kúreń-qasqasy ıelense, úshinshi oryn Bekarystan bı aýylynyń shabandozy Nurbolattyń Ulytaý atty júırigine buıyrdy. Kelesi kezekte qunan báıge uıymdastyrylyp, 12 shaqyrymdyq tórt aınalymda 18 qunan baq synady. Dodada Jambyl oblysynan kelgen Mıras tizgindegen Lafıza júırigi aldyna jan salǵan joq. Sozaq aýdanynan Meıir shabandozdyń Altynqasqa atty tory aty ekinshi bolyp jetse, Qyzylorda qalasynan kelgen Nurtastyń Ponomero atty tulpary úshinshi orynǵa ilikti, — delingen habarlamada.
21 shaqyrymǵa sozylǵan oshaq báıgedegi 7 aınalymda 16 tulpar baq synady. Nátıjesinde Qazaly aýdanynyń namysyn qorǵaǵan Nurym shabandozdyń Baqtory atty tulpary aldyna qara salmaı márege birinshi bolyp jetti. Ekinshi oryn da osy aýdannyń ókili Abylaıdyń Sekret atty júırigine buıyrdy. Al úshinshi oryndy Tumar atty tulparymen Erasyl shabandoz ıelendi.
Al at báıgesi qorytyndylanǵan alamanda Almaty oblysynyń Ámir esimdi shabandozy Major degen júırigimen birinshi oryndy jeńip aldy. Odan keıingi eki oryndy araldyq Raýan tizgindegen Qozykúreń men jambyldyq Damırdiń Talmas esimdi tory aty ózara bólisti.
Jeńimpazdar men júldegerlerge qomaqty syılyqtar tabystaldy.
Buǵan deıin Jeńistiń 80 jyldyǵyna oraı Qyzylorda oblysynyń Aral aýdanynda aýdan ákimdiginiń júldesi úshin oblystyq at báıgesi ótti.