Qazalyda HH ǵasyrda salynǵan sý qyspaqty munara áli kúnge jumys istep tur
QYZYLORDA. KAZINFORM — Qyzylorda oblysy Qazaly aýdanynyń Áıteke bı kentinde bastaýyn patshalyq Reseıden alatyn arhıtektýralyq eskertkish bar. Ol — sý qyspaqty munara.
Aýdan ákiminiń baspasóz qyzmeti habarlaǵandaı, atalǵan nysan HH ǵasyrdyń basynda, Orynbor-Tashkent temirjol qurylysy kezeńinde salynǵan.
— Munara kúıdirilgen kirpishten salynǵan, bıiktigi — 29, eni — 8 metr. Eki qabatty ǵımarattyń tómengi qabatynda kireberis oıyq bar. Ásem ári shyǵyńqy túrde órnektelgen qasbeti soltústik-batysqa qaraǵan. Dál osy jerde, búıir bet jaǵynda bir terezeden qoıylǵan. Tereze oıyqtary jartylaı dóńgelek qaqpalarmen jabylǵan, bezendirilip qaptalǵan. Kireberis qaqpalardyń oıyqtary sáýle kiretindeı qorǵan tasymen aıshyqtalǵan. Tómengi qabaty eki bólikke bólinedi. Joǵarǵy bóligine kireberiste shaǵyn tereze oıyǵy ornatylǵan. Onyń ústinen joǵarǵy qabatty tómengisinen bólip turatyn aralyq erneý ótedi, — delingen habarlamada.
Munara Áıteke bı kentiniń halqyn sýmen qamtýǵa arnalǵan, vokzal ǵımaratynyń batys bóliginde tur.
Biletinder onyń aıtarlyqtaı bıik bolýyn ishine úlken kólemde sý jınalýynan jáne temirjol beketine qajet bolǵasyn qatty aǵyspen túsetininen dep túsindiredi. Sý toly eki rezervýar da osy sebepti ornatylǵan kórinedi.
Ǵasyrdan astam tarıhy bar nysan qyzmeti temirjol úshin áli kúnge mańyzdy. Aýdan ákimdigi tarıhı eskertkishti saqtaý úshin onyń esik-terezesi men shatyryn aýystyryp, qasbetin jańǵyrtyp, aınalasyn abattandyrýǵa qarjy bólip, byltyrdan beri merdiger jumys atqaryp jatyr.
Buǵan deıin biz 85 jyldan astam tarıhy bar Qyzylorda oblystyq tarıhı-ólketaný mýzeıiniń asyl kómbesimen tanysyp, jańǵyrtylǵan jádigerler týraly aqparat ázirlegen edik.