Qazalyda 12 myń turǵyndy jol azabynan qutqaratyn kópir ótkeli salynyp jatyr
QYZYLORDA. KAZINFORM — Bıyl kópir qurylysyn jalǵastyrýǵa respýblıkalyq bıýdjetten 758,4 mln teńge qarajat bólindi.
Parlament Májilisiniń depýtaty, «AMANAT» partııasy fraktsııasynyń múshesi Murat Ergeshbaev, Parlament Senatynyń depýtattary Naýryzbaı Baıqadamov jáne Rýslan Rústemov jumys saparymen Qazaly aýdanynda boldy. Olar Qazaly-Qojabaqy-Bozkól-Káýkeı avtojolynyń 16-shaqyrymyndaǵy Syrdarııa arqyly ótetin kópir ótkeliniń qurylysymen tanysty.
Partııanyń oblystyq fılıalynan habarlaǵandaı, nysan qurylysy 2022 jyly bastalǵan. Biraq alǵashqy merdiger «StandartOılKZO» JShS ózine júktelgen mindettemeni tolyq oryndamaı, kelisimshart sot tártibimen buzylǵan. Keıin qaıtadan konkýrs jarııalanyp, jańa merdiger anyqtaldy. Qurylys jumysyn «Nurly Taý LTD» JShS qolǵa aldy. Jalpy uzyndyǵy 2,5 shaqyrym bolatyn bul avtojol III sanatqa jatady. Qazir qurylysshylar kópirge jalǵasatyn kirme joldardy topyraqpen kóterip jatyr. Bıyl kópir qurylysyn jalǵastyrýǵa respýblıkalyq bıýdjetten 758,4 mln teńge qarajat bólindi.
— Depýtattar qurylys qarqyny men sapasyna nazar aýdaryp, mańyzdy ınfraqurylymdyq jobanyń jergilikti turǵyndar úshin joǵary mánge ıe ekenin atap ótti. Atap aıtqanda, jańa kópir paıdalanýǵa berilgennen keıin Jankent, Birlik, Qojabaqy, Arandy, Bozkól, Tasótkel, Laqaly, Ajar, Tasaryq jáne Káýkeı eldi mekenderinde turatyn 12 myńǵa jýyq turǵynnyń aýdan ortalyǵyna qatynaý múmkindigi jaqsaryp, kólik qatynasy aıtarlyqtaı jeńildeıdi, — delingen habarlamada.
Qyzylorda oblysyna jumys saparymen kelgen Parlament Májilisiniń depýtaty, «AMANAT» partııasy depýtattyq fraktsııasynyń múshesi Murat Ergeshbaev Qyzylorda qalasynyń Tasbóget kentinde ornalasqan modýldi bıologııalyq tazartý stantsııasyna barǵan bolatyn.