Qazaly aýdanyndaǵy «saqaldy» kópir qurylysy qashan aıaqtalady
QYZYLORDA. KAZINFORM – 2022 jyly Qyzylorda oblysynyń Qazaly aýdanynda Qazaly-Qojabaqy-Bozkól-Káýkeı avtomobıl jolynyń 16-shaqyrymyndaǵy Qarlań ýchaskesinde temir betondy kópir qurylysy bastalǵan bolatyn.
Biraq merdigerdiń jaýapsyzdyǵynan qurylys orta joldan toqtap qaldy. Aýdan ákimi Almasbek Esmahanov Kazinform tilshisine uzaqqa sozylǵan jumystyń qashan aıaqtalatynyn aıtyp berdi.
- Merdiger mekeme ózine júktelgen mindettemelerin tolyq oryndamaǵasyn sot protsesteri ótip, kelisimshart birjaqty buzyldy. Qaıtadan memlekettik satyp alý konkýrsy jarııalanyp, «NurlyTaý LTD» jaýapkershiligi shekteýli seriktestigi jeńdi. Ótken jyly sáýir aıynda kópir qurylysy qaıta bastalyp, jańa merdiger mekeme jumysty bastady. Búginde kópirdiń kireberis jolyn salyp, Syrdarııa ózenindegi sýdy ýaqytsha bógeý arqyly beton tireýlerdi quıyp jatyr, - dedi ol.
Kópir qurylysyn jalǵastyrýǵa byltyr 758,4 mln teńge bólinse, jobalyq- smetalyq qujat qarjysy qaıta eseptelip, joba quny keıin 6,3 mlrd teńgege artty.
Aýdan ákiminiń aıtýynsha, kópir qurylysy jyl sońyna deıin aıaqtalady.
Aıta keteıik, oblystaǵy jergilikti mańyzy bar joldarda avtomattandyrylǵan salmaq ólsheý stantsııalaryn ornatý baǵytynda aýqymdy jumys qolǵa alyndy.