Qazaqy ulttyq naqyshtaǵy qýyrshaqtar shet elde úlken suranysqa ıe - qolóner sheberi
ALMATY. Jeltoqsannyń 7-si. QazAqparat /Erbol Azanbek/ - Qazaqtyń ulttyq kıimindegi qýyrshaqtar shet elde úlken suranysqa ıe. Bul týraly Almatyda ótken «Shyǵystyq jańa jyl» atty Ortalyq Azııa qolónershileriniń kórme-jármeńkesinde Qazaqstandyq qolóner sheberi, qýyrshaq jasaýshy Roza Sársenbaeva aıtty ,
dep habarlaıdy QazAqparat.
Onyń aıtýynsha, qoldan jasalǵandyqtan qýyrshaqtardyń baǵasy qymbattaý. Mysaly, kólemi men bezendirilýine qaraı 1000-2500 teńge aralyǵynda. «Óz otandastarymyz arasynda baǵasynyń qymbattyǵynan ba, kóp suranysqa ıe emes. Alaıda, shet eldikter arnaıy tapsyryspen alǵyzyp jatady. Máselen, jasaǵan qýyrshaqtarymnyń 90 paıyzy shet eldikterge satylady. Olardy qýyrshaqtardaǵy qazaqtyń ulttyq kıimderi, ulttyq aspaptary, bezendirilýi qyzyqtyrady. Árbir qýyrshaq qolmen kestelenip, áshekeı buıymdar tigiledi», deıdi qolónershi.
Onyń aıtýynsha, qazaqy beınedegi qýyrshaqtar jasaýdy 1990 jyldary elimizge shet eldikter kóptep kele bastaǵan tusta qolǵa alǵan. «Qazaqtarda eshteme joq demesin degen namyspen, halqymyzdy, onyń baı ulttyq murasyn, mádenıetin, saltyn, shet elge tanytý maqsat boldy. Sodan beri dombyra tartyp otyrǵan jigitter men besik terbetip otyrǵan, jún ıirip otyrǵan áıelder beınelengen «Ana men bala», «Qazaqtyń mýzykalyq aspaptary», «Qazaq kıimderi» serııalarymen qýyrshaqtar jasadym. Bizdiń qazaqtar óte sheber halyq. Bir ǵana bas kıiminiń ózi neshe alýan, kıimderiniń ózi neshe túrli», deıdi qolónershi. Ol jylyna 100-ge jýyq qazaqy naqyshtaǵy qýyrshaq jasaıtyn kórinedi.
