Qazaqy tazylar tarıhta tuńǵysh ret Dúnıejúzilik ıtter kórmesine qatysady

ASTANA. QazAqparat – 21-27 tamyz aralyǵynda Jeneva qalasynda Halyqaralyq kınologııalyq federatsııanyń (FCI) Bas Assambleıasy ótedi. Assambleıa aıasynda ótetin eń bedeldi ıtter kórmesi - 2023 jylǵy álem chempıonatyna (World Dog Show 2023) Qazaqstannan eki tazy Astanadan shaǵyn avtobýspen attanady, dep habarlaıdy QazAqparat tilshisi.

Qazaqstan Kınologter odaǵynyń (QKO) aqparatynsha, qazaqstandyq tazy ıtter tarıhta tuńǵysh ret osyndaı álem chempıonatyna qatysýda. Aıta ketý kerek, buǵan bastamashy bolǵan – halyqaralyq arenada eldiń taza tuqymdy ıtterin nasıhattaýmen belsendi aınalysatyn otandyq kınologter odaǵy.

«Qazaqy tazy tarıhta alǵash ret Eýropalyq odaq elderiniń dúnıejúzilik kórmesine qatysatyn boldy. Osy jolda úlken jumys atqaryldy. Biz Belgııadaǵy FCI-men arada (Halyqaralyq kınologııalyq federatsııa) birqatar kelissóz júrgizdik. Bıyl sáýir aıynda Qazaqstan kınologteri odaǵynyń ótinishi boıynsha, Kazakh Tazy tuńǵysh ret Halyqaralyq kınologııa federatsııasynda ıt tuqymdarynyń nomenklatýralyq tizimine engizildi. Bizdiń usynysymyz FCI tarapynan qoldaý tapqanyna óte qýanyshtymyz», - dedi Qazaqstan Kınologter odaǵynyń prezıdenti Baýyrjan Serikqalı.
Sondaı-aq 21-22 tamyz kúnderi ótetin Halyqaralyq kınologııa federatsııasynyń bas assambleıasynda Qazaqstandy osy uıymnyń tolyq quqyly múshesi retinde taný máselesi qarastyrylatyny atap ótildi.
Eske sala ketsek, naýryz aıynyń sońynda Qazaqstan Prezıdenti Qasym-Jomart Toqaev tazy ıtterdiń kórmesin tamashalady.
Memleket basshysy tazyny halyqaralyq deńgeıde dáripteý qajet ekenin aıtty.
– Qumaı tazy – erekshe janýar, qazaqtyń jeti qazynasynyń biri. Biz tazy men tóbetti halyqaralyq deńgeıde keńirek dáripteýimiz kerek. Syrtqy ister mınıstrligi de mindetti túrde atsalysýy qajet. Tazyǵa erekshe kútim, qamqorlyq kerek. Bul mańyzdy is kásibılikti talap etedi. Sol úshin arnaıy zań qabyldadyq, – dedi Qasym-Jomart Toqaev.
Qazaqy ıt tuqymdaryn saqtaý jáne ósimin molaıtý máseleleri jónindegi QR Zańy 1 shildede kúshine endi.