Qazaqtyń jas nokaýtery kezekti jeńisine jetti
ASTANA. QazAqparat - Búgin Astanadaǵy kásipqoı boks keshinde qazaqstandyq boksshy Aıdos Erbosynuly (6-0, 6KO) kezekti ret nokaýtpen jeńiske jetti. Bul joly ol argentınalyq Djonatan Barbadılomen (17-4-1, 14 KO) judyryqtasty, dep xabarlaıdy QazAqparat tilshisi.
Aıdos Erbosynuly birden óz qarsylasyn qyspaqqa aldy. Aýyr djebteri dittegen jerine jetip, qarsylasyn eseńgiretip otyrdy. Al birinshi mınýttan keıin argentınalyq boksshy nokdaýnǵa túsip qaldy. Degenmen, qaıta turyp, jekpe-jekti jalǵastyrýǵa kelisti. Aıdos bolsa, birden aýyr soqqylaryn jaýdyra bastady. Sóıtip, óz qarsylasyn taǵy sulatyp tastady. Djonatan turdy. Alaıda kóp uzamaı, onyń bapkeri sharshy alańǵa súlgi tastap, jekpe-jekti jalǵastyrýdan bas tartty.
«Jekpe-jekke deıin jaraqattarym bolǵan. Degenmen, jeńiske jete bildik. Barlyǵyna alǵysymdy aıtamyn. Aldaǵy ýaqytta álem chempıony bolýǵa tyrysamyz», - deıdi Aıdos Erbosynuly.
Búgingi boks keshiniń basty jekpe-jeginde Qanat Islam (24-0, 19KO) kanadalyq Brendon Kýkke (18-0, 11KO) qarsy shyǵady. Olar birinshi orta salmaqtaǵy WBA Inter-Continental jáne WBO-NABO nusqasynyń chempıondyq ataqtaryn sarapqa salady.
Boks keshin «Qazsport» telearnasy tikeleı efırde kórsetip jatyr. 20:00-de «Qazaqstan» ulttyq arnasy da tikeleı efırge shyǵady. Budan bólek, Fite.tv ınternet arnasy, sondaı-aq TVtibi men Flipps arqyly tikeleı reportajdar júrigizedi.
Alǵashqy jekpe-jekte qazaqstandyq boksshy Meıirim Nursultanov bir mınýttyń ishinde óz qarsylasyn nokaýtpen jeńdi.
Al «Nıý-Iorktyń úzdik polıtseıi» Dımash Nııazov elirgen qarsylasyn sabasyna túsirdi.
