Qazaqtyń jas aqyndary Júnis Emreniń tańdamaly óleńderin qazaq tiline aýdardy
Qazaqstan jazýshylar odaǵynyń Nur-Sultan qalasy fılıaly men Júnis Emre ınstıtýtynyń Qazaqstandaǵy ókildigi uıymdastyrǵan sharaǵa zııaly qaýym ókilderi, ǵalymdar men dıplomattar qatysty.
Túrkııanyń Qazaqstandaǵy Tótenshe jáne Ókiletti Elshisi Ýfýk Ekıdjı ıgilikti iske muryndyq bolǵan adamdarǵa alǵys aıtyp, baýyrlas eldiń atynan rızashylyq bildirdi.
«Búgin Júnis Emre ınstıtýtynyń Qazaqstan Jazýshylar odaǵymen birge atqarǵan jemisti jumysynyń nátıjesi retinde aqynnyń qazaqsha tańdamaly óleńder kitabyn tanystyrǵaly otyrmyz. 2 naýryz kúni eki baýyrlas eldiń arasynda dıplomatııalyq qarym-qatynas ornaǵanyna 30 jyl toldy. Búgingi shara osyndaı mańyzdy oqıǵaǵa sáıkes kelip otyr. Aýdarmadaǵy negizgi kórkemdik róldi óz moınyna alǵan 19 qadirli qazaq aqynyn osy mańyzdy jobalarymen quttyqtaımyn», - dedi Elshi.
Qazaqstan Jazýshylar odaǵynyń Nur-Sultan qalasy fılıanyń dırektory Dáýletkereı Kápulynyń aıtýynsha, bul aýdarmaǵa kileń jas aqyndar atsalysqan.
«2021 jyl túrki dúnıesine ortaq tulǵa Júnis Emre jyly bolǵanyn bilesizder. Shaıyrdyń jyrlaryn qazaq tiline buǵan deıin de úlken aqyndarymyz aýdarǵan. Nesipbek Aıtuly, Ulyqbek Esdáýlet aǵalarymyzdyń aýdarmalary bar. Bıyl Halyqaralyq túrki akademııasynyń qoldaýymen qazaqtyń kórnekti aqyny Svetqalı Nurjanovtyń aýdarmasy oqyrmanǵa jol tartty. Bul qazaq aqyndary Júnis Emreni aýdarýdan jarysyp jatyr degen sóz emes. Júnis Emre ınstıtýtynyń Qazaqstandaǵy ókildigi bizben baılanysqa shyǵyp, Túrkııadaǵy ǵalymdar iriktegen 72 óleńdi aýdarmaǵa usyndy. ıAǵnı aýdarylatyn óleńderdi aýdarmashylar emes, Júnis Emre murasyn zerttep júrgen ǵalymdar tańdady. Bizde dástúr sabaqtastyǵy deıtin dúnıe bar. Sol rette bul jolǵy aýdarmaǵa úlken aýdarmashylarymyzdy qospaı, jas aqyndardy tarttyq. Atap turyp aıtsaq, Qazaqstan jazýshylar odaǵynyń Nur-Sultan qalalyq fılıalyndaǵy odaq músheleri, eldiń ár óńirinde ádebıetke ózindik únderimen kelgen jas daryn ıeleri aýdarmaǵa atsalysty. Bir jaǵynan aýdarma aqyndy shynyqtyrady, ekinshi jaǵynan shyǵarmashylyq izdeniske ıtermeleıdi. Mine sondyqtan jas aqyndardy tarttyq», - deıdi Jazýshylar odaǵynyń ókili.
Aýdarma jınaǵy 1000 danamen basylypty. Onyń negizgi bóligi eldegi kitaphanalarǵa taratylmaq.
«Bizdiń keıbir aqyndarymyz Júnis Emreni qazirgi túrik tilindegi nusqasynan aýdarǵan. Bul aýdarmanyń ereksheligi dep aıtýǵa bolady, biz kóne túrki tilindegi nusqasynasymen salystyryp otyryp aýdardyq. Qazirgi túrik tili men eski túrki tiliniń arasynda paryq bar. Sol eski túrki tilinen áýeli qazirgi túrik tiline túsirip, sodan qazaqsha jolma-jol aýdarma jasaldy. Osy taraptan kelgende aqyndar aýdarmaǵa qatty qınaldy deýge kelmeıdi.
Jazýshylar odaǵynyń bastamasymen Ázerbaıjan halqynyń qazirgi zamandaǵy poezııasynyń antologııasyn aýdarǵanbyz. Eshqandaı qalamaqysyz, aqyndardyń júrek qalaýymen atqaryldy bul sharýa. Endi osy jolmen ıakýt-saha poezııasynyń antologııasyn aýdaryp jatyrmyz», - dedi Dáýetkereı Kápuly.
Shara sońynda aýdarma jumysyna belsendi atsalysqan aqyndar men uıymdastyrýshylar Túrkııa elshiligi men Júnis Emre ınstıtýtynyń atynan estelik syılyqtar tabystaldy.
