Qazaqtyń úsh bıiniń tájirıbesin jalǵastyrýǵa nıettimiz - EQYU ókili

ASTANA. QazAqparat - Qazaqtyń úsh bıi sýdıalardy tárbıeleý isinde óte jaqsy úlgi bolyp otyr. Bul týraly sýdıalardy irikteý júıesin jańǵyrtý taqyrybyna arnalǵan dóńgelek ústel otyrysynda Astanada ornalasqan EQYU baǵdarlamalary keńsesiniń basshysy Derd Sabo málim etti, dep habarlaıdy QazAqparat.

«Sot salasynda Qazaqstanda tıisti ońtaıly tájirıbe bar. Máselen, osy eldegi kóshe ataýlarynda úsh ataqty bıdiń (Tóle, Qazybek, Áıteke bıler) atyn jıi kezdestiremiz. Basqa elder aýmaǵyndaǵy qalalar kóshelerinde sýdıalardyń atyn bergenin jıi kezdestirmeısizder. Birneshe ǵasyr ótse de, úsh bıdiń júrgizgen sot tóreligin halyq esh umytqan emes. Meniń oıymsha, bul óte jaqsy dástúr. Osy ıgi dástúrdi sizdermen birge jalǵastyrýǵa nıettimiz. Sondyqtan osyndaı úsh bıdi úlgi tutqan sýdıalardy kóptep kezdestirgimiz keledi», - dedi Derd Sabo.

Óz kezeginde QR Parlament Májilisi Zańnama jáne sot-quqyqtyq reformalar komıtetiniń tóraǵasy Nurlan Ábdirov qoǵamdyq sanany damytý - sýdıa bolýǵa kandıdattardy irikteý, jetildirý sharalaryn qabyldaýdy talap etetinin atap ótti. 

«Álemde sýdıa kásibi bedeldi ári mártebeli ekenin qupııa emes. Kóbine ony zańger mansabynyń shegi dep esepteıdi. Bul turǵyda laıyqty kandıdatty tańdaý óte mańyzdy. Tereń bilimi men tájirıbesiniń bolýymen qatar, ol adal ári ózgeniń yqpalyna berilmeıtin prıntsıpti adam bolýǵa tıis», - dedi.