Qazaqtyń uly sardary Baıan batyrdyń týǵanyna 300 jyl
ASTANA. 4 qarasha. QazAqparat -Qazaq tarıhyndaǵy iri tulǵalardyń biri Baıan batyrdyń el úshin atqarǵan erlik isteri orasan.
Eldiń amandyǵy, jerdiń tutastyǵy úshin janyn shúberekke túıip, jasanǵan jaýǵa qarsy jasaǵan batyl qolbasshylyq qımyldary, utymdy sheshimderi men jeńisti jekpe jekteri úshin Baıan batyrdy búgingi urpaǵy aıryqsha rýhty tulǵa retinde tanıdy. Týǵan el úshin, atameken jer úshin janyn aıamaǵan qaharman ulyn halyq eshqashan umytpaıdy. Aldaǵy kele jatqan batyrdyń 300 jyldyq mereıtoıy eldiń eńse kóterer erekshe toıy bolmaq, dep jazady kaznews.mn.
Shoqan Ýálıhanov: Abylaı hannan barlyq úsh júzdegi óz batyrlarynan qaısysyn erekshe qurmetteıtindigi týraly suraǵanda ol: «..Meniń batyrlarymnyń baılyǵy men minezi jaǵynan básentıin Malaısary jáne erjúrektiligi jaǵynan ýaq Baıan barlyǵynan bıik tur» dep jaýap beripti.
Qazaq Memleketiniń izin qalaǵan uly Abylaı hannyń senimdi serigi bolǵan, óziniń alǵyrlyǵymen, tapqyrlyǵymen el irgesin jaýdan qorǵaýda kózsiz erlik kórsetken batyr Baıan Qasabolatulynyń esimi qazaq tarıhynda erekshe atalýy qajet. Osyǵan oraı «Baıan batyr» qoǵamdyq qory ashylyp, ata baba ónegesine, Alash tarıhyna, babalardyń arýaǵyna degen perzenttik paryzyn tereń túsinetin el azamattary Er Qosaı men Er Kókshe, Qyldy batyr men Ótemis batyr, Baıan batyr men Er Sary batyrlardyń erlik rýhy men tarıhyn ulyqtaý maqsatynda rýhanııattyq sharalardy atqarýdy josparlap otyr. Sonyń biregeıi - arystan júrekti qazaq sardary Baıan batyr esimin ulyqtaý.
