Qazaqtyń ulttyq agrarlyq ýnıversıtetine Ýkraına Halyq Batyrynan quttyqtaý hat keldi
Bul týraly Qazaq ulttyq agrarlyq ýnıversıtetiniń rektory Tilektes Esbolov búgin Almatyda Uly Jeńistiń 67 jáne Qazaqstan Qarýly kúshteriniń 20 jyldyǵyna arnalǵan saltanatty shara kezinde aıtty.
«Uly Otan soǵysy jyldary 1941-1945 jyldary Kıev aýyl sharýashylyǵy ınstıtýtynyń 150 oqytýshysy men 400-deı stýdenti Qazaqstanǵa qonys aýdardy. Almatydaǵy Qazaq aýyl sharýashylyǵy ınstıtýtynyń shańyraǵynan pana tapqan olar jyl saıyn Jeńis kúni qarsańynda qonaqjaı qazaq eline alǵys hat joldaýdy dástúrge aınaldyrýda. Bul ıgi dástúr bıyl da óz jalǵasyn taýyp otyr», - deıdi T.Esbolov. Onyń aıtýynsha, Ýkraına Halyq Batyry, Ýkraına ulttyq ýnıversıtetiniń rektory Dmıtrıı Alekseevıch óz ujymynyń atynan joldaǵan bul hatynda da qazaq halqyna, onyń bilim ordasyna zor alǵysyn bildirgen.
«Bizdiń oqý ornymyzdan soǵys bastalǵan kezde alǵashqy kezekte 250 adam maıdanǵa attanǵan bolatyn. Keıin olardyń qatary 600-ge deıin jetti. Alaıda sum soǵystan elge tek 40 paıyzy ǵana oralǵan edi. Qazirgi tańda onyń 9-y ǵana qaldy. Búgingi sharaǵa solardyń arasynan Zulqarnaı Seıitov, Aleksandr Medvedov sekildi 6 ardager qatysyp otyr», - deıdi ýnıversıtet basshysy T.Esbolov.
