«Qazaqtyń uldary»: Erjan Maksımniń jańa beınebaıany shyqty
NUR-SULTAN. QazAqparat – Qazaqstandyq daryndy ánshi Erjan Maksımniń jańa beınebaıany tanystyryldy, dep habarlaıdy QazAqparat tilshisi.
«Men bul ándi elimizdiń Táýelsizdik kúnine arnaǵym keledi. Halqymyz tatý-tátti ári birlikte ómir súrgenin qalaımyn», - dedi ánshi.
Beınebaıandy Almatyda «Habar» agenttiginiń shyǵarmashylyq toby túsirgen. Ánge jaýyngerlik rýh, taısalmaıtyn minez, qajymas qaırat arqaý bolǵan. Basty keıipker retinde Erjan Maksımniń ózi túsken. Sondaı-aq klıpten tanymal ánshilerden Búrkit pen Nurlan Abdýllındi, Jigitter tobyn, sportshylardan Olımpıada chempıony Ermahan Ibraımovti, kásipqoı boksshy Janqosh Turarovty kórýge bolady.
«Habar» telearnasynyń dırektory Dınara Bısembına jastarǵa osylaısha qoldaý bildirý kerektigin aıtady.
«Erjan Maksımdi qoldaýǵa bel býdyq. Án batyrlarǵa arnalǵan. Bul beınebaıandy Erjannyń qazaqstandyqtarǵa arnaǵan syıy deýge bolady», - deıdi ol.
