Qazaqtyń tuńǵysh Olımpıada chempıony jeńiske jetken sátin eske aldy
MÁSKEÝ. QazAqparat - Tanymal basketbolshy, qazaqtan shyqqan tuńǵysh Olımpıada chempıony Áljan Jarmuhamedov jáne reseılik «Dvıjenıe vverh» blokbasterinde onyń rólin somdaǵan Aleksandr Rıapolov Qazaqstan Respýblıkasynyń Reseıdegi elshiligine qonaq boldy, dep habarlaıdy "QazAqparat" HAA Máskeýdegi menshikti tilshisi.
Áljan Jarmuhamedov qazaqstandyq stýdentterge, qazaqstandyq jáne sheteldik dıplomattarǵa kásibı joldaǵy óz tarıhyn jáne 1972 jyly Mıýnhende ótken Olımpıadadaǵy KSRO basketbol quramasynyń jeńisi týraly aıtyp berdi.
«Fılm qyzyqty ári áserli shyǵypty. Meni ózine baýrap aldy. Bul kadrlerge qaraǵan saıyn jastyq shaǵymdy eske alamyn. Fılmdi alǵash kórgende qobaljyp, qan qysymym kóterilip, ádette elý ret soǵatyn tamyrymnyń soǵý jıiligi júzge jetti», - dep óz áserimen bólisti kartına keıipkerleriniń biri Áljan Jarmuhamedov.
Kórkem fılm bolǵandyqtan, Á.Jarmuhamedovtiń aıtýynsha, shyǵarmashylyq top oıdan shyǵarylǵan sátterdi de qosýǵa haqyly edi.
«Kartına avtorlary matchtaǵy dramatızmdi bere aldy, oıyn qalaı júrdi, psıhologııalyq turǵyda qandaı kúrdeli bolǵanyn kórsetti. Ásirese sońǵy úsh sekýnd, tóreshiler ústelindegi jantalas. Sol sátte ekranda da, zalda da kórermender siltideı tynady, doptyń shyǵyryqqa túsýin kútedi. Fılmdi ár qaraǵan saıyn valerıanka ishýge týra keldi», - deıdi Á. Jarmuhamedov.
