Qazaqtyń tuńǵysh Olımpıada chempıony: Zeınet jasynda úıde otyra almadym
ASTANA. QazAqparat - Mádenıet jáne sport mınıstri Arystanbek Muhamedıuly KSRO basketbolynyń jaryq juldyzy, qazaqtyń tuńǵysh Olımpıada chempıony Áljan Jarmuhamedovpen kezdesti, dep habarlaıdy QazAqparat.
«Kezekti ret atajurtqa kelip otyrmyn. Búgin mınıstrmen jaqsy kezdesý ótti jáne sportqa qatysty ózara pikir almastyq. Osy sátti paıdalana otyryp, qazaq sportyna sáttilik tileımin. Jastary bıik shyńdardy baǵyndyryp, Qazaqstannyń mártebesin kótere bersin», - dep tilegen bildirdi ardager basketbolshy.
Sonymen qatar Áljan Jarmuhamedov keshe Astanada 1972 jylǵy Olımpıada kezinde KSRO basketbolshylarynyń jeńisine arnalǵan «Dvıjenıe vverh» atty fılmniń kórsetilimine qatysqanyn eske salyp ótti.
«Bul fılm 1972 jyly Mıýnhende tarıhı fınaldyq matchke arnalǵan. Sol kezde KSRO sportshylarynyń quramynda men de bolǵan edim. Fılmdi tamashalaý barysynda kórermender tarapynan úlken qyzyǵýshylyq bolǵanyn baıqadym. Zalǵa kelgen árbir kórermen menimen amandasyp, fotosýretke túsýge tyrysty. Osyndaı jyly shyraı tanytqan qandastaryma alǵysymdy aıtqym keledi», - deıdi KSRO basketbolynyń jaryq juldyzy.
Onyń aıtýynsha, onyń eki uly da sport ınstıtýtyn támamdaǵan. Osy ýaqytqa deıin úlken uly olımpıada rezerviniń balalar sport mektebinde qyzmet etken. Qazirgi kezde ol tolyqtaı kásipkerlikke betburys jasaǵan eken. Al ekinshi uly «Hımkı» basketbol klýbynda jastar komandasyn jattyqtyryp júr.
«Zeınetkerlikke shyqqanmen, úıde otyra almadym. Ómir boıy qozǵalysta bolǵan adam retinde sporttan alystaý maǵan óte aýyr tıdi. Sondyqtan ertede meniń balalarym oqyǵan mektepten alys emes jerde jetkinshekterdi basketbol oınaýǵa baýlydym. Qazirgi kezde de sonda qyzmet etip júrmin. Men búgin aýa raıyna qarap, alańdap otyrmyn. Sebebi erteń saǵat 11:45-te ótetin jattyǵýǵa úlgerýim kerek», - deıdi Áljan Músirbekuly.
Á. Jarmuhamedov 1944 jyly 2 qazanda Ońtústik Qazaqstan oblysynda dúnıege kelgen. KSRO-nyń eńbek sińirgen sport sheberi. 1970-1974 jáne 1976-1980 jyldar aralyǵynda KSRO-nyń, 1972 jyly Mıýnhendegi (Germanııa), 1980 jyly Máskeýdegi (Reseı) Olımpıadalyq oıyndarynyń, 1967, 1971 jáne 1979 jyldary Eýropanyń chempıony. Qazirgi kezde qazaq chempıony Máskeýde turady. Vladıslav esimdi ulymen birgen balalar men jasóspirimderge arnalǵan «Laýrýs» basketbol klýbyn qurdy.
