Qazaqtyń tuńǵysh mýltıplıkatory Ámen Qaıdarov kóz jumdy
ALMATY. QazAqparat - Toqsan eki jasqa qaraǵan shaǵynda qazaqtyń tuńǵysh mýltıplıkatory, «Qarlyǵashtyq quıryǵy nege aıyr?» mýltfılminiń avtory, kórnekti rejısser Ámen Qaıdarov kóz jumdy. Bul aqparatty «Qazaqfılm» AQ baspasóz qyzmeti rastady.
Kınorejısser, sýretshi, QazKSR-iniń eńbek sińirgen óner qaıratkeri Ámen Qaıdarov 1923 jyly Qaraǵandy óńirinde dúnıege kelgen. 1951 jyly Almaty sýretshiler ýchılışesin bitirgen soń "Qazaqstan áıelderi", "Ara" jýrnaldarynyń redaktsııalarynda jumys istedi. 1958-1965 jyldary Máskeýdegi memlekettik kınematografııa ınstıtýtynyń kórkemsýret fakýltetinde oqydy. 1965 jyldan "Qazaqfılm" kınostýdııasynda jumys istedi.
Ol - Qazaqstandaǵy mýltıplıkatsııalyq janrdyń irgesin qalaýshylardyń biri. 1967 jyly Qaıdarovtyń salǵan sýreti boıynsha halyq ertegisi negizinde tuńǵysh túrli-tústi "Qarlyǵashtyń quıryǵy nege aıyr?" atty mýltıplıkatsııalyq fılm jasaldy. Bul týyndy Lenıngrad (qazirgi Sankt-Peterbýrg) qalasynda ótken Búkilodaqtyq kınofestıvalda (1968), Nıý-Iork qalasynda ótken Halyqaralyq mýltıplıkatsııalyq fılmder festıvalynda júlde aldy. Sondaı-aq, Qaıdarov "Quıyrshyq", "Janar", "Kún sáýlesinen paıda bolǵan kójek" atty mýltıplıkatsııalyq fılmderdi jasaǵan. 1980 jyly Qaıdarovqa "Aqsaq qulan", "Qojanasyr - qurylysshy", "Qyryq ótirik" sııaqty mýltıplıkatsııalyq fılmder toptamasy úshin QazKSR Memlekettik syılyq berildi. "Qurmet Belgisi", "Parasat" ordenderimen jáne medaldarmen marapattalǵan.
Baspasóz qyzmetinde, belgili rejısserdi aqtyq saparǵa shyǵaryp salý rásimi erteń ótetinin habarlady.
