Qazaqtyń tili men mádenıeti qyzyqtyrady – atyraýlyq dombyrashy Andrıan Romanov
Andrıan Romanov Jylyoı aýdanynyń ortalyǵy – Qulsary qalasynda turady. Osyndaǵy Qulsary balalar óner mektebiniń dombyra klasyn bitirgen. Al, inisi fortepıano klasynda oqyp júr.
Ol byltyr «Myń bala» jobasy aıasynda «Ónerli órge júzer» baıqaýyna qatysqan. Baıqaýdyń maqsaty – ózge etnostar balalarynyń qazaqtyń ulttyq ónerin meńgerýge qyzyǵýshylyǵyn oıatý.
«Meniń tańdaǵan aspabym – dombyra. Kishkentaı kezimnen dombyranyń únin unatýshy edim. Al, dombyra tartýdy ustazym Talant Balǵynbaev úıretti. Baıqaýda qazaqtyń qaıtalanbas kompozıtory Qurmanǵazy Saǵyrbaıulynyń «Adaı» kúıin oryndadym. Nege bul kúıdi tańdadym? Óıtkeni, bul – adamnyń kóńil-kúıin sharyqtatatyn, jigerlendiretin kúı. Osy kúıdi oryndaý arqyly baıqaýdyń jeńimpazy atandym. Astanada Aqparat jáne qoǵamdyq damý mınıstri Darhan Qydyráliniń qolynan marapat alǵan sátte qýanyshymda shek bolmady. Dombyrada oınaýdy meńgerýime, respýblıkalyq baıqaýdyń jeńimpazy atanýyma ustazymnyń eńbegi zor» -deıdi Andrıan Romanov.
Jas dombyrashynyń aıtýynsha, Jylyoı aýdanynda qazaqpen birge birneshe etnostyń ókili turady. Onyń ishinde orystar men tatarlar, ózbekter pen qaraqalpaqtar bar.
«Bizdiń aýdanda qazaqtyń ónerin dáriptep júrgen, ásirese, dombyra shertýdi meńgergen ózge etnostyń ókilderi de bar. Óıtkeni, týǵan elińniń tarıhyn, jergilikti ulttyń tili men salt-dástúrin, ádebıeti men mádenıetin tereń bilý artyq etpeıdi. Ózim qazaqsha erkin sóıleımin», -deıdi Andrıan Romanov.
Endi ol bolashaǵyn qazaq ónerimen baılanystyrýdy kózdep otyr. Onyń armany – Aqtaýdaǵy óner kolledjinde bilim alý.
Eske sala ketelik, budan buryn atyraýlyq káris qyzy qazaq tiline baýyr basyp, qazaq jigitine turmysqa shyqqanyn aıtqan edi.
