Qazaqtyń termesi atústi qaraıtyn óner emes - Ábsattar Qajy Derbisáli
ASTANA. 10 aqpan. QazAqparat - Qazaqtyń termesi atústi qaraıtyn óner emes. Keshe Qazaqstan Musylmandary Dinı Basqarmasy men Astanadaǵy Áziret Sultan meshiti uıymdastyrǵan respýblıkalyq «Tekti sózdiń tóresi - terme» atty jyr báıgesin qorytyndylaý keshin ashyp sóz sóılegen Qazaqstan Musylmandary Dinı Basqarmasynyń tóraǵasy, Bas múftı, sheıh Ábsattar Qajy Derbisáli osylaı málimdedi.
Bas Múftı respýblıkalyq báıgege túsken termelerdi saraptaý barysynda onyń tereń mazmunyna, aıtar oıyna, sol oıyn júıeli jetkize bilýine basa nazar aýdarylǵanyn tilge tıek etti. «Terme» sózi barlyq danyshpan oılardyń mańyzy men máıegin terip berý degen maǵynaǵa saıatyndyqtan, onyń árbir sózinde asyldaı qundy salmaq jatýy tıis. Asan Qaıǵy aıtpaqshy, «taza minsiz asyl sóz oı túbinde jatady», al «oı túbinde jatqan sóz sher tolqytsa shyǵady», - dedi ol óz sózinde. Sondaı-aq, Dinbasy báıge qorjynyna túsken termelerge de baǵa berip, saraptama qorytyndysyna da toqtalyp ótti. «Báıgege qatysýshylardyń keıbireýi terme degenniń ne ekenin túsinbegen tárizdi. Biri maǵynasyz uıqas qýyp ketse, biriniń jazǵany termeniń tabıǵatynan alys ketken. Kóp adamdar báıgege termelerin «áıteýir bap shappasa da, baq shaýyp qalar» degen qysyr úmitpen tapsyra salǵan. Basqa bireýleri buryn oryndalǵan, arnaıy báıge úshin jazylmaǵan termelerin joldap jibergen. Mine, osyndaı dúnıelerdiń bárin elep-ekshep, dodaǵa túsken termelerdiń ishinen úzdikterin saraptap shyqtyq», - dedi Dinbasy.
Onyń aıtýynsha, qorjynǵa túsken termelerdi saraptaýǵa, úzdikterin anyqtap, laıyqty baǵasyn berýge kómektesken qazylardyń arasynda termeniń maıtalman sheberleri, maqamdy zerttep júrgen ǵalymdar, termeshiler, sózdiń parqyn biletin aqyndar boldy. Al termeniń dinı mazmunyna «Áziret Sultan» meshitiniń bas ımamy Qaırat Joldybaıulynyń ózi qarady.
Sóz sońynda Hazireti Múftı «Áziret Sultan» meshiti muryndyq bolǵan bul bastamany Mádenıet mınıstrligi ári qaraı dóńgeletip áketip, jańa termeler báıgesin dástúrli túrde uıymdastyryp otyrsa, nur ústine nur bolar edi» dep óz oıyn jetkizdi.
«Terme termeshiniń sózi men isi qabysqanda ǵana adam júreginen oryn tappaq. Kezindegi dýaly aýyz Maılyqoja, Shal aqyn, Imanjúsip termeleriniń el jadynda jańǵyryp, búgingi kúnge deıin saqtalýynyń, ózektiligi men ómirsheńdigin joǵaltpaýynyń syry da osynda. Sondyqtan da, terme atústi qaraıtyn óner emes», - deıdi Bas múftı Ábsattar qajy.
