Qazaqtyń teatr men kıno rejısserlary óziniń qoltańbasyn áli ashyp kórsetken joq - Tuńǵyshbaı ál-Tarazı
ALMATY. Naýryzdyń 29-y. QazAqparat /Erlik Erjanuly/ - Qazaqtyń satıralyq, estradalyq teatrlary áli qalyptasa almaı jatyr.
Sondyqtan da rejıssýra aıaǵynan aqsaýda, deıdi QazAqparatqa suhbat bergen ónertaný ǵylymynyń kandıdaty, professor Tuńǵyshbaı ál-Tarazı.
"Rejısser mamandyǵy ámbebap bolýy kerek. Bizde dramatýrgııanyń barlyq janrlarynyń sánin keltirip qoıa alatyn rejısser joq. Olar kóbine-kóp drama men kıno ónerine oıysa beredi. Qazir estradaǵa kim kóringen rejısser bop júr. Ózderin estrada teatry atap júrgenderdiń tirligi bir kúndik kontserttik baǵdarlamalarmen shektelýde. Halyq arasynda án-jyr bolǵan soń keńpeıildik tanytyp qabyldap júr. Bul baıaǵy "Tamashanyń" úlgisi. Sol úrdis pen rejıssýralyq sheshim áli qaıtalanýda", deıdi Tuńǵyshbaı ál-Tarazı. Ónertanýshy ǵalymnyń aıtýynsha, teatrda 5-6 mınýttyq árbir ıntermedııanyń óz rejısseri bolýy kerek. Satıranyń janry, uǵymy bólek. Oǵan mán bermegendikten kórermen qazir bárin birdeı bir teatr, bir janr dep qabyldap júr. "Teatrǵa tárbıeshi bolýdyń keregi joq. Teatr - mektep emes, tárbıe beretin ne ýaǵyz aıtatyn jer de emes. Ol estetıkalyq talǵamdy bıiktetetin oryn. Bul bólekshe álem. Teatr - qoǵamnyń, adamnyń aqyl-oıy men pıǵylynyń jáne talǵamynan jarty qadam bolsa da alda júrýi kerek. Bul ondaǵy barlyq shyǵarmashylyq ıeleriniń óz rólin jetik meńgerýine baılanysty", deıdi QR halyq ártisi Tuńǵyshbaı ál-Tarazı. Onyń sózine qaraǵanda, qazir rejısserlar keıde akterdi mensinbeıdi. Al olar teńdeı sýretker jáne odaqtastyq bolǵan jerde ǵana úlken týyndy týady. Sondyqtan teatrda da, kınoda da qazaq rejıssýrasy óziniń qoltańbasyn áli tolyq tanyta qoıǵan joq.
