Qazaqtyń tarıhı tulǵalarymen baılanysty sheteldegi kıeli jerlerdi zertteý jalǵasady
«Búginde Qazaqstannyń kıeli jerleriniń geografııasy jobasy boıynsha 2018 jylǵa jospar ázirlendi. Olardyń qatarynda mynadaı is-sharalar engizilip otyr: kitaptar, fotoalbomdar, entsıklopedııalar, sonyń ishinde «Kıeli Qazaqstan» entsıklopedııasynyń 2-shi tomyn shyǵarý; óńirlerge etnomádenı ekspedıtsııalardy jalǵastyrý; Qazaqstannyń mádenı jáne týrıstik tartymdylyǵy týraly áleýmettik jeliler úshin mobıldi formattaǵy beınerolıkterdi úsh tilde túsirýdi jalǵastyrý; kıeli jerlerdi keńinen nasıhattaý, sondaı-aq jańa etnografııalyq jobalardy júzege asyrý, jańa týrıstik baǵyttardy ashý maqsatyndaǵy óńirlerdegi jumystardy úılestirý», - dedi mınıstr.
Sonymen qatar ol shetelderde qazaq halqynyń belgili tarıhı tulǵalarymen baılanysty kıeli jerlerdi zertteý jumystary qolǵa alynǵanyn aıtty.
«Mysaly, ózderińiz bilesizder Ózbekstanda Tóle bı, Áıteke bı, Astrahanda Qurmanǵazynyń jatqan jerleri bar. Sondaı jerlerdi tanystyrýdy jalǵastyrýymyz kerek. Jalpy alǵanda Elbasynyń baǵdarlamalyq maqalasynyń arqasynda Qazaqstanda kıeli jerlerdi zertteý jańa sapaǵa kóterildi. Kıeli jerler týraly kitaptar shyǵarylyp, fılmder túsirilýde. Vırtýaldy jáne ınteraktıvti kartalar jasalyp,beınerolıkter túsirý sııaqty jumystar jalǵasýda»,- dedi Arystanbek Muhamedıuly.
Osy rette QR Prezıdenti Ákimshiliginiń basshysy, Qoǵamdyq sanany jańǵyrtý baǵdarlamasyn iske asyrý jónindegi ulttyq komıssııanyń tóraǵasy Ádilbek Jaqsybekov óńirlik týrızmdi damytý maqsatynda oblystarǵa «Qazaqstannyń qasıetti jerleri» jobasynyń barlyq nysandaryn qajetti ınfraqurylymdarmen qamtamasyz etýdi tapsyrdy.
