Qazaqtyń tarıhı, mádenı murasy baǵa jetpes jańa ǵylymı eńbektermen tolyqty - QR Ulttyq kitaphanasy dırektorynyń orynbasary
ALMATY. 5 sáýir. QazAqparat - Búgin Almatyda «Myrza Muhammad Haıdar Dýlat parsy derekkózderinde» jáne Hıbatýlla at-Tarazı jáne onyń rýhanı murasy» dep atalatyn jańa kitaptardyń tusaýkeseri rásimi ótti.
Olar Qazaqstan musylmandary dinı basqarmasy men Ortalyq Azııa mýftıler keńesiniń tóraǵasy, Bas múftı Ábsattar qajy Derbisáliniń bastamasymen jaryq kórip otyr.
«Orta ǵasyrdyń álemge áıgili belgili oıshyl-ǵalymdarynyń ómiri men shyǵarmashylyq muralaryna arnalǵan bul kitaptar kóp jylǵy ǵylymı izdenistiń nátıjesi. Bul eńbekterdiń qazaqtyń tarıhı, mádenı murasyn zertteýde ǵalymdar men oqyrmandar úshin ǵylymı mańyzdy eńbek bolary sózsiz. Biz búgingi is-shara aıasynda oqyrman qaýymnyń nazaryna QR Ulttyq kitaphanasynyń qorynan Ábsattar qajynyń da ómiri men shyǵarmashylyǵyna arnalǵan «Ustaz. Ǵalym. Qaıratker» atty kitap kórmesin usynyp otyrmyz. Oǵan 200-den astam kitaptar men jýrnaldardan maqalalar qoıylǵan», - deıdi QR Ulttyq kitaphanasy dırektorynyń orynbasary Baqytjamal Qaıyrbekqyzy.
