Qazaqtyń «Taqııaly perishtesi» ómirden ozdy

TALDYQORǴAN. QazAqparat - Qalyń kópshilikke «Taılaq» esimimen tanylǵan «Taqııaly perishte» fılminiń bas keıipkeri ómirden ozdy, - dep habarlaıdy QazAqparat tilshisi.

Iisi qazaq súısinip kóretin «Taqııaly perishte» fılminiń bas keıipkeri, aty ańyzǵa aınalǵan akter, Qazaqstan Respýblıkasynyń Mádenıet qaıratkeri, Almaty oblysynyń Qurmetti azamaty Álimǵazy Raıynbekov ómirden ozdy.

Álimǵazy Sumaǵululy 1936 jyly 1 jeltoqsanda Almaty oblysynda dúnıege kelgen. Alǵashqy eńbek jolyn aýylda júrgizýshi bolyp bastaǵan. 1965 jyly alǵashqy «Án qanatynda» fılminiń sporttyq is-sharalaryna shaqyrtý alady. 1966 jyly «Qıly kezeń» fılmine túsedi.

1968 jyly qazaq kınosynyń altyn qorynan oıyp turyp oryn alǵan «Taqııaly perishte» (rejısseri Sháken Aımanov) kınofılmindegi Taılaqtyń rólin somdaıdy. Osy kezden bastap jurtshylyqqa keńinen tanylady. Budan bólek, «Kógildir taksı», «Qan men ter» sekildi onnan asa kınofılmge túsken. Birneshe merekelik medal men Qurmet gramotalaryn alǵan. Almaty oblysy Kóksý aýdanynyń da Qurmetti azamaty.

Álimǵazy Raıynbekov ómiriniń sońyna deıin qoǵamdyq jumystarǵa belsene aralasyp, jas urpaqty tárbıeleýge úlken úles qosty. Kez kelgen is-sharalarda aq batasyn berip, el amandyǵyn tilep júretin, nemere-shóberelerine úlgili azamat edi.

Álimǵazy Raıynbekovti týǵan jerinde jerleıdi. Aqtyq saparǵa shyǵaryp salý rásimi Kóksý aýdany, Eńbekshiqazaq aýylynda erteń ótedi. Bul jóninde marqumnyń balalary habarlady.

Álimǵazy Raıynbekov 10 balanyń ákesi. Bes ul, bes qyz tárbıelep ósirgen arda tulǵanyń jarqyn beınesi halqynyń júreginde saqtalady.

Foto:qazaqstan.tv