Qazaqtyń taǵy bir bylǵary qolǵap sheberi kásipqoı boksqa aýysty
ASTANA. QazAqparat - Taǵy bir qazaq sportshysy Alı Baloev kásipqoı boksqa aýysty, dep habarlaıdy QazAqparat tilshisi.
Esterińizde bolsa, osydan biraz ýaqyt buryn Rıo-de Janeıro Olımpıadasynyń chempıony Danııar Eleýsinov kásipqoı boksqa birjola bet burǵanyn málimdegen bolatyn.
Sondaı-aq, keshe ǵana Qanat Islam «Kazakh team» komandasyna Rýslan Myrsataev kelip qosylǵanyn maqtanyshpen jetkizgen edi. Ol áleýmettik jelisindegi óz paraqshasynda: «Amerıkadaǵy «Kazakh team» komandasy qazaqtardy álemge tanytýdy maqsat etip otyr. Qazaqtyń jastary, qazaqtyń batyrlary kelińder, bizdiń komandaǵa qosylyńdar! Qazaqtyń týyn birge kótereıik, Alǵa Qazaqstan!» - dep jazdy.
Al 23 jastaǵy Alı Baloev 18 aqpanda Rıgadaǵy (Latvııa) Olımpıada sport ortalyǵynda óziniń kásipqoı bokstaǵy alǵashqy jekpe-jegin ótkizýdi belgilep qoıypty.
Ol 4 raýndtyq kezdesýde 32 jastaǵy jergilikti boksshy Markes Kovalevskıspen aıqasqa túsedi. Jerlesimizdiń qarsylasy kásipqoı boksta 25 kezdesý ótkizip, ekeýinde teń nátıje, ekeýinde - jeńis, jıyrma birinde jeńilis (11 nokaýtpen) taýypty.
Qazaqstandyq sportshy kásibı boksta rıngke aýyr salmaqta (200 fýnt - 90,7 keli) shyqpaq. Alı almatydaǵy «Abylaı han» zalynda, Saǵatbek Musahanovtyń qol astynda jattyǵady.
