Qazaqtyń tabıǵı qurt-maıyna suranys artyp keledi
AQTÓBE. QazAqparat - Aqtóbelik kópbalaly ana birneshe sharýashylyqtan sút qabyldap, ulttyq taǵamdar ázirleıdi. Aınur Jolmaǵambetovanyń aıtýynsha, suranys kún sanap artyp keledi, dep habarlaıdy QazAqparat tilshisi.
Aqtóbe oblysy, Alǵa aýdany, Bestamaq aýylynyń turǵyny kún saıyn sút óńdep otyr. ıAǵnı, aıran uıytady, qurt jasaıdy, qaımaq shaıqap, maı daıyndaıdy. Jyl boıy úzdiksiz sút qabyldaıtyn «Yqylas» aýyl óndiristik kooperatıvi 2016 jyldan beri tabysty jumys istep keledi. Turaqty satyp alýshylar men tapsyrys berýshileri bar.
«Ulttyq taǵamǵa suranys óte joǵary. Sıyr saýǵan kezde sútti alyp ketýge kelip turady. Adamdar pakettegi, qospasy bar sútten sharshaǵan, tabıǵı ónimdi izdep turady. Sarysý, ishimshikti de alady. Sút qaldyqsyz ónim. Tek shydam men tózim kerek. Maıqurt ta umtylyp barady. Ony aıran, maı, qanttan jasaıdy. Maıqurtty qaınatýǵa 5-6 saǵat kerek», - deıdi Aınur Jolmaǵambetova.
Al irimshikti qaınatý úshin 7-8 saǵat ýaqyt jumsalady. Al sharýashylyq aıyna 100-150 keli irimshik satyp otyr.
«Men sharýa qojalyqtarynan sút qabyldaımyn. Qazir kúnine 200 lıtr sút ákeledi. Al jazda 3-4 tonnasyn qabyldaımyz. Sol kezde sútti óńdep, qurt, maı, irimshik jasap, saqtap qoıamyz. Tońazytqyshqa salyp, qysta satýǵa shyǵaramyz. Biz úshin qys mezgili óte sátti ýaqyt. Dál osy shaqta suranys joǵary. Baǵa da qymbat emes. Bazar baǵasynan arzan. Bizdi izdep keletinder, tapsyrys beretinder kóp», - deıdi kópbalaly ana.
Ol bul jumystarǵa óz balalaryn da mashyqtandyrǵan. 7 balanyń anasy ul-qyzdaryn ulttyq taǵam jasaýǵa úıretip júr. Al ydys jýý úshin jumysshylar alǵan. Barlyǵy 5 adamdy jumyspen qamtamasyz etip otyr.
«Qospasy kóp tamaq jegen adamnyń densaýlyǵy syr beredi. Shynyn aıtqanda, qazaq óziniń tabıǵı qurt pen maıyn qatty saǵyndy. Sondyqtan da aýylǵa qaraı bet buryp, qoldan ónim alady. Bazarda qaımaqtyń birneshe túri bar, biraq dámi basqa, qunary bólek. 20-30 lıtr qaımaq 10-20 mınýtta satylyp ketedi, talasyp qalady. Kúnine 150 lıtr aıranǵa da suranys bar. Máselen, irimshikti máıekten jasaımyz. Al tátti irimshikke brynza jasaýǵa arnalǵan pepsın qosamyz», - deıdi kásipker.
Qazirgi kezde sharýashylyq sút ónimderiniń 12 túrin shyǵaryp otyr. Aldaǵy ýaqytta aýylsharýashylyq kooperatıvi ónim kólemin arttyrmaq.
