«Qazaqtyń shapanyna qatty qyzyqty» - baspasózge sholý
*** Elimiz Eýrazııalyq ekonomıkalyq odaq aıasynda áreket etip keledi. Alda Dúnıejúzilik saýda uıymyna múshelikke ótý mindeti qoıylǵan. Qazirgi jahandyq deńgeıdegi tutynýshylar úshin jahandyq kúreste elimiz qanshalyqty básekege qabiletti degen suraq árbir qazaqstandyqtyń kókeıinde júrgeni anyq. Osyny jáne ózge de saýaldardy qaperge ala otyryp, «Egemen Qazaqstan» gazetiniń tilshisi Parlament Senatynyń depýtaty, Qarjy jáne bıýdjet komıtetiniń múshesi Erbolat Muqaevqa jolyǵyp, birqatar suraqtarǵa tushymdy jaýap alǵan. Basylym tilshisiniń ár saýalyna egjeı-tegjeıli jaýap bergen depýtat: «Otandyq ónimderdiń barlyǵy básekege qabiletti deýden aýlaqpyn, biraq suranysqa ıe taýarlarymyz da bar. Elimizdiń ındýstrııalyq-ınnovatsııalyq damýy qajettigin Elbasy «Nurly Jol - bolashaqqa bastar jol» atty óz Joldaýynda aıqyn atap kórsetti. Qazir elimizde 2015-2019 jyldarǵa arnalǵan ındýstrııalyq-ınnovatsııalyq baǵdarlamanyń ekinshi kezeńi júzege asyrylýda. Onyń birinshi kezeńi 2010-2014 jyldary júrgizildi. Sol birinshi kezeńniń qorytyndysy boıynsha óndeý ónerkásibiniń alty salasy tańdap alynǵan-dy. Olar: metallýrgııa, hımııa, mashına jasaý, qurylys materıaldary jáne tamaq ónerkásibi. Baǵdarlamanyń ekinshi kezeńinde ońtaılandyrylǵan 2015-2017 jyldarǵa arnalǵan respýblıkalyq bıýdjette elimizdiń ındýstrııalyq-ınnovatsııalyq damýy týraly memlekettik baǵdarlamaǵa 230,2 mıllıard teńge kózdelgen. Onyń ishinde 2015 jylǵa 102 mıllıard teńge qarastyrylsa, 2016 jylǵa - 52 mıllıard, al 2017 jylǵa 45 mıllıard teńge bólinetin bolady. Eger birinshi kezeńdi qarastyryp kórer bolsaq, Elbasynyń ózi de atap ketti, baǵdarlama júzege asyrylǵan bes jyldyń ishinde bizde 400 jańadan buryn-sońdy Qazaqstanda bolmaǵan ónimder shyǵarylýda», - deıdi. Suhbat basylymnyń senbilik sanynda «Sapaly ónimder ǵana básekege laıyq» degen taqyryppen berilgen.
Elbasy N.Nazarbaevtyń ulyqtaý rásiminde sóılegen sózi búginde qoǵamda keńinen talqylanýda. Máselen, «Egemen Qazaqstan» gazetiniń senbilik sanynda elimizdiń bir top azamatynyń QR Prezıdentiniń aıtqan sózderine qatysty pikirleri jarııa etilgen. Aıtalyq, «Fıtohımııa» halyqaralyq ǵylymı-óndiristik holdınginiń zerthana meńgerýshisi, hımııa ǵylymdarynyń doktory, professor Borash Tileýovtiń pikirinshe, Elbasy N.Nazarbaevtyń Qazaqstan Respýblıkasy Prezıdenti laýazymyna kirisý rásiminde sóılegen sózinde kórsetilgen bes aýqymdy ishki mindet bárimizge ortaq joǵary jaýapkershilik júkteıdi. «Qazaqstan Ortalyq Azııadaǵy myqty memleketke aınaldy, álem jurtshylyǵy moıyndady. Keshe Elbasyn ulyqtaý rásiminde Reseı men AQSh prezıdentteri «bul sizdiń eńbegińizdiń jemisi» dep quttyqtap jatyr. Buryn birine amalsyzdan bodan bolsaq, ekinshi alpaýyt memleket qazaq jaıly estigen de joq edi ǵoı. Búginde qazaq balasynyń nesibesi ózinde, dáýleti tasydy. Nursultan Nazarbaevtyń «Nurly Joly» adastyrmas temirqazyǵymyz, Elbasymyz Qazaqstandy taǵy da bıikke bastaı bersin, biz súıeý bolaıyq», - deıdi altyn alqa ıegeri Jámıla Janysbaeva. *** Ótken aptada Saýd Arabııasynyń Mádına shaharynyń ámiri, taq murageri Feısal Salman ál-Saýdtyń qoldaýymen Halyqaralyq kórme bolyp ótti. Bul jaıynda «Aıqyn» gazetiniń búgingi nómirindegi «Qazaqtyń shapanyna qatty qyzyqty» degen taqyryptaǵy maqalada baıandalǵan. Basylymnyń jazýynsha, álemniń 60-tan astam memleketi qatysqan aıtýly sharaǵa Saýd Arabııasynda bilim alyp jatqan qazaqstandyq stýdentter de qatysyp, darhan halqymyzdyń danalyǵy men daralyǵyn pash etti. «Qazaq jastary tikken úıge Mádına qalasynyń ámiri Feısal bın Salmannyń ózi bas suǵyp, qazaq úıiniń qurylysyna tańdanysyn bildirdi. Qazy-qartadan aýyz tıip, qymyz ishken qala ámiri qazaqy shapanǵa da qatty qyzyǵýshylyq tanytqan. Taq murageriniń ıyǵyna qazaq jastary shapan jaýyp, halqymyzda syıly qonaqqa at mingizip, shapan jabatyn qonaqjaı salty týraly da aıtyldy. Kórme aıasynda alystan kóz tartqan qazaq úıine Mádına qalasyndaǵy Islam ýnıversıtetiniń rektory Ibrahım ál-Ýbaıd jáne Taıba ýnıversıtetiniń rektory, doktor Adnon ál-Mazrý, Saýd Arabııasy Ǵulamalar keńesiniń múshesi Abdýlazız ál-Faýzan jáne basqa da memleketterdiń elshileri men kóptegen ǵalymdar bas suǵyp, qazaqstandyq jastardyń daıyndyǵyn joǵary baǵalap jatty»,- delingen maqalada. *** «Vasılıı Jırov Stıven Sıgaldyń fılmine túspek», - dep jazady «Kazahstanskaıa pravda» gazeti. Aıta keterligi, buǵan deıin «Qazaqstan» telearnasynyń stýdııasynda elimizden shyqqan tuńǵysh orta aýyr salmaqtaǵy kásibı boksshy óziniń súıiktisine shańyraq kóterýge usynys jasaǵan bolatyn. Sonymen, qazirgi ýaqytta V.Jırov Gollıvýd akteri Stıven Sıgaldy jeke jattyqtyrady. Onyń sózine qaraǵanda, Sıgal qoıan-qoltyq urys óneri jaıynda kezekti týyndysyn túsirmek ári ondaǵy rólderdiń birin Jırovqa usynǵan. Boksshy da bul usynysqa kelisimin bergen. Qazirgi ýaqytta fılmge daıyndyq jumystary júrgizilýde. Munan bólek, dańqty jerlesimiz Los-Andjeleste fıtnes zalyn ashýdy da josparlap otyr. *** «Krihsa.kz saıty arqyly satylymǵa 90 myń páter men 23,7 myń jeke turǵyn shyǵaryldy», - dep jazady «Vremıa» gazeti «Moı dom - nasha krepost» degen taqyryptaǵy maqalasynda. Basylymnyń naqtylaı túsýinshe, satylymǵa shyǵarylǵan jeke turǵyn úılerdiń sany 21 paıyzǵa ósse, bir aı ishinde jyljymaıtyn múlkinen qutylýǵa tyrysqan azamattardyń sany 13 paıyzǵa óse túsken.
