Qazaqtyń sany revolıýtsııaǵa deıin 8 mıllıon bolǵan - Smaǵul Elýbaev

NUR-SULTAN. QazAqparat – Asharshylyq jyldary 5 200 000 qazaqtan aıyryldyq. «Egemen Qazaqstan» basylymynyń uıymdastyrýymen 31 mamyr – Qýǵyn-súrgin jáne asharlyq qurbandaryn eske alý kúnine arnalǵan «Ǵasyr zulmaty» taqyrybynda ótken onlaın dóngelek ústelde jazýshy Smaǵul Elýbaı osylaı aıtty, dep habarlaıdy QazAqparat tilshisi.

«Álemniń qozǵaýshy kúshteri álsizderdi basyp alýǵa kiristi, nátıjesinde birinshi dúnıejúzilik soǵys, odan keıin ekinshi dúnıejúzilik soǵys boldy. ıAǵnı, adamdardy qyrýǵa teorııalyq negizder jasaldy. Eń kedeı qazaqtyń ózinde 50 bas qoıy, 4-5 iri qarasy bolatyn. Bul Reseıden kelgen Goloşekınniń kózimen qaraǵanda qazaq halqy qyrylýy kerek edi. 1992 jylǵy komıssııa quramynda Talas Ómirbek boldy. Ol komıssııa 1931-1932 jyldardaǵy asharshylyqtan 2 300 000 qazaq qyrylǵanyn aıtty. Sonda Turar Rysqulov 1918-1919 jyly 1 214 000 adam qyryldy dese, Muhtar Áýezov 1921 jylǵy asharshylyqta 1 700 000 qazaq qyryldy dedi. Ekeýin qossaq, 3 mıllıonǵa jýyqtaıdy. Buǵan 2 300 000-dy qossaq, on shaqty jyl ishinde 5 200 000 qazaqtan aıyryldyq», - deıdi Smaǵul Elýbaı.

Onyń aıtýynsha, zamanaýı tarıhta teń jartysynan aıyrylǵan qazaqtyń tragedııasyndaı tragedııa bolǵan emes.

«Naqty derekpen sóılegende jaǵdaı osyndaı. Biz 10-15 jyl ishinde 5 200 000 qazaqtan aıyryldyq. «Munsha qazaq qaıdan paıda boldy?» degen suraq týyndasa, qolymyzda Orynbordaǵy tarıh ınstıtýtyn basqarǵan Aleksandr Chýloshnıkovtyń kitaby bar. Onda qazaqtyń sany revolıýtsııaǵa deıin 8 mıllıon bolǵandyǵy týraly aqparat bar», - deıdi ol.

foto: brod.kz