Qazaqtyń salt-dástúrin jeńgelerimnen úırendim – Lıýdmıla Bobrova
ATYRAÝ. QazAqparat – Qazaq jigitine turmysqa shyqqan orys qyzy Lıýdmıla Bobrova ulttyq salt-dástúrdi berik ustanady. Onyń bes aǵasy qazaqtyń qyzyna úılengen. Ol qazaq halqynyń salt-dástúrin jeńgelerinen úırengenin aıtyp berdi, dep habarlaıdy QazAqparat.
Mahambet aýdanynda Sarytoǵaı atalatyn aýyl bar. Munda qazaqpen birge ózge etnostyń ókilderi de turady. Solardyń biri – Bobrovtar otbasy.
«Ákem Semen Sarytoǵaıdan qonys aýdarǵan joq. Sheshem Rozanyń ata-anasy Tájikstan Respýblıkasynan kóship kelgen. Sarytoǵaıdaǵy orta mektepti bitirgen soń qazirgi H.Dosmuhamedov atyndaǵy Atyraý ýnıversıtetiniń aǵylshyn tiliniń muǵalimi mamandyǵyna oqýǵa tústim. Mektepte oryssha oqysam da qazaq tilin jetik bilemin. Buǵan mekteptegi ustazym Іzǵalı Qashaýbaevtyń qoldaýymen qazaq tili páninen bilim olımpıadalaryna qatysyp, júldeli oryndardy ıelengenim sebep bolǵanyn jasyrmaımyn. Mektepte mýzykadan dáris bergen jergilikti kompozıtor Qaıyrjan Ihsanov qazaqtyń halyq ánderin oryndaýyma septigin tıgizdi. Qazaqsha ánderdi áli aıtyp júrmin», -deıdi Lıýdmıla Bobrova.
Onyń aıtýynsha, bes aǵasy bar. Aǵalarynyń bári qazaq qyzdaryna úılengen.
«Úlken aǵaıym qazaq qyzyna úılengende quda túsý, syrǵa salý dástúrin jasadyq. Bul keıingi aǵalarym úılengende de jalǵasty. On bes jasqa tolǵanymda otbasymyzǵa Jansulý esimdi jeńgem kelin bolyp tústi. Sol kezde jeńgemniń 18-de edi. Jeńgelerimnen qazaq halqynyń salt-dástúri men jón-joralǵyny úırendim. Jansulý jeńgem Kórisý kúni – 14 naýryz ben Ulystyń uly kúni – 22 naýryzda ulttyq taǵamdardy pisirip, erekshe dastarhan daıyndaıdy», -dep aǵynan jaryla áńgimeledi ol.
Lıýdmıla Bobrova 18 jyl buryn qazaq jigiti – Ǵalymjan Jıenqulovqa turmysqa shyqqan. Qazir Taldykól aýylynda turady.
«Shynymdy aıtsam, bala kúnimnen qazaq balalarymen birge oınadym. Biraq, otbasylyq ómirimdi qazaq jigitimen baılanystyramyn dep oılamappyn. Ǵalymjanmen shańyraq kóterýge sóz baılasqanda, buǵan áke-sheshem de, aǵalarym da qarsy bolmady. Sóıtip, qazaq otbasynyń tabaldyryǵyn attadym. Ata-enem meni óz qyzyndaı baýyryna tartty. Olar –óte meıirimdi, adal, sabyrly, aýyldastarymyz syılaıtyn qarapaıym jandar. Meniń jaqsylyǵymdy asyryp, jamandyǵymdy jasyryp, qoldaý kórsetkenin jadymnan shyǵarmaımyn. Úlken enemniń óz syrǵasyn qulaǵyma salyp, baýyryna tartqanyn eshqashan umytpaımyn. Kishi enemnen de kóp nárseni úırendim. Únemi batasyn berip otyratyn. Ata-enem – 7 bala tárbıelegen kópbalaly otbasy. Qaıynaǵalar men abysyndarym, qaıynapa-qaıynsińlilerimmen tatýlyǵymyz jarasqan», -deıdi qazaqtyń kelini.
Qazir Ǵalymjan men Lıýdmılanyń 1 qyzy, 4 uly bar. Balalarynyń úlkeni kolledjde oqıdy. Kúıeýi «QazSýshar» RMK-nyń Atyraý fılıalynda jumys isteıdi. Al, Lıýdmıla – mekteptiń múǵalimi.
«Jańa túsken kelinge qurmet kórsetip, kelinshaıǵa shaqyratyn joralǵy qazaqtan basqa ultta joq. Qazaq halqynyń ár salt-dástúri men joralǵysynyń astarynda úlken tárbıelik mán bar. Enemniń ómirden ótkeni ókinishti-aq. Qazir atamyzben bir úıde turamyz. Úıimizden áli kúnge qonaq úzilgen emes. Ulystyń uly kúninde aǵaıyn-týysqa Kórisý shaıyn berýge daıyndalyp jatyrmyn», - deıdi Lıýdmıla Bobrova.
