«Qazaqtyń Motsarty» Santa Chechılııa akademııasynyń eń jas túlegi atandy
NUR-SULTAN. QazAqparat - «Qazaqtyń Motsarty», jas kompozıtor Rahat-Bı Ábdisaǵın Italııadaǵy Santa Chechılııa akademııasynyń doktorantýrasyn támamdady, dep habarlaıdy QazAqparat Syrtqy ister mınıstrliginiń baspasóz qyzmetine silteme jasap.
Santa Chechılııa akademııasy - Italııadaǵy eń ejelgi mýzyka mekemeleriniń biri. 1585 jyly Rımde kongregatsııa retinde negizi qalanǵan, al 1838 jyly akademııa bolyp qaıta qurylǵan. Onyń músheleriniń qatarynda K.Monteverdı, Dj.Freskobaldı, Dj.Karıssımı, L.Kerýbını, N.Paganını, Dj.Rossını, G.Donıtsettı, Dj.Verdı, Dj.Pýchchını, A.Toskanını sekildi uly kompozıtorlar bar. Al akademııanyń qurmetti músheleri - R. Vagner, F. Lıst, F. Mendelson, K. Debıýssı, M. Ravel, K. Sen-Sans, Dj. Eneský, P. Hındemıt, A. Onegger, F. Pýlenk, B. Brıtten, I. F. Stravınskıı, A. K. Glazýnov, S. V. Rahmanınov, S. S.Prokofev, D. D. Shostakovıch, A. I. Hachatýrıan, D. F. Oıstrah jáne basqalar.
Bul oqý ornyna túsý úshin jyl saıyn búkil álemnen júzdegen kompozıtorlar baq synaıdy. Degenmen, sonyń ishindegi eń úzdikteri ǵana oqýǵa qabyldanady. Rahat-Bı Ábdisaǵın 2017 jyly akademııaǵa qabyldanǵan tańdaýly 5 shákirttiń biri boldy, mine, endi arada eki jyl ótkende oqý ornynyń tarıhyndaǵy eń jas túlek atanyp otyr.
Akademııany bitirý synaǵynda Rahat-Bı óziniń 11 oryndaýshyǵa arnap jazylǵan «Ombre del Vuoto» («Úmitsizdik kóleńkesi») atty týyndysyn usyndy. «Úmitsizdik kóleńkesi» - sımfonııalyq orkestrdiń barlyq toby qamtylǵan sımfonııanyń bir túri.
Eske sala keteıik, Rahat-Bı Ábdisaǵın - kompozıtor jáne pıanıst, ónertaný ǵylymynyń magıstri, júzden astam klassıkalyq shyǵarmanyń avtory. «Daryn» memlekettik jastar syılyǵynyń laýreaty jáne «100 jańa esim» jobasynyń jeńimpazy.
