«Qazaqtyń Messıi» Ordabasy klýbynda oınamaıtyn boldy
ASTANA. QazAqparat - «Ýfa» fýtbol klýbynyń basshylyǵy qazaqstandyq shabýylshy Erkebulan Seıdahmetti «Ordabasy» komandasyna jibermeı qoıdy, dep habarlaıdy «SPORTINFORM» SAA.
Shymkenttik klýbtyń menedjerleri bolashaǵynan zor úmit kúttiretin fýtbolshyny óz qataryna qosý úshin bar kúshin saldy. Alaıda «Ýfa» basshylaryna Seıdahmetke qatysty jańa, budan da tıimdi usynys túsýine baılanysty kelissózder aıaqsyz qaldy.
Biraq bul qandaı usynys ekeni aıtylmady. Erkebulanǵa qyzyǵýshylyq bildirip otyrǵan ekinshi klýb Almatynyń «Qaıraty» bolýy múmkin. Almatylyqtarmen aradaǵy kelissózder de ońaı ótip jatqan joq. «Qazaq Messıin» satyp alǵysy keletinder úshin basty kedergi - jas fýtbolshynyń baǵasy.
Buǵan deıin Erkebulan Seıdahmet «Ordabasy» komandasyna aýysýy múmkin ekeni habarlanǵan bolatyn. Taraptar kelisimge kelip qoıdy delingen edi. Fýtbolshynyń ózi «Qaırat» sapyna aýysqysy keledi. Óıtkeni almatylyq komandada Erkebulannyń bala kezden súıikti oıynshysy Baýyrjan Islamhan oınaıdy.
