Qazaqtyń memlekettik Muhtar Áýezov atyndaǵy akademııalyq drama teatry 85-shi maýsymyn ashty
ALMATY. Qazannyń 14-i. QazAqparat /Erlik Erjanuly/ - Búgin Almatyda Qazaqtyń memlekettik Muhtar Áýezov atyndaǵy drama teatry óziniń 85-shi maýsymyn "Abaı" tragedııasymen ashty. Teatr bul qoıylymnyń tanystyrylymyn ótken maýsymnyń jabylý rásiminde jasaǵan bolatyn.
Teatr dırektory, kórkemdik jetekshisi Esmuhan Obaevtyń aıtýynsha, bul teatrda osymen tórtinshi ret sahnalanyp otyrǵan "Abaı" spektakli buǵan deıingilerden ózgesherek. "Búgingi kún turǵysynan qoıylǵan pesada jas akterlar oınaıdy jáne ondaǵy kórinister de bólekteý. Áýezovtyń 65 jyl buryn Abaıdyń aýzyna salǵan sózderi búgingi kúnniń kóp quıtyrqy suraqtaryna jaýap beredi. Adamǵa oı salady. Burynǵy keńes zamany bolsa kesip alyp tastaıtyn keıbir tustary da bar. Biz Abaıdyń sózderin qysqartýǵa barǵan joqpyz" deıdi qoıylym rejısseri E. Obaev. QR halyq artısiniń sózine qaraǵanda, buǵan deıin spektakldi Asqar Toqpanov, Ázirbaıjan Mámbetov, Bolat Atabaev qoıǵan bolatyn.
