Qazaqtyń M.Áýezov atyndaǵy akademııalyq drama teatry Pavlodar óńirine gastroldik saparǵa shyǵady
ALMATY. 5 mamyr. QazAqparat - Qazaqtyń Muhtat Áýezov atyndaǵy memlekettik akademııalyq drama teatry 16-27 mamyr kúnderi Pavlodar, Ekibaztuz, Aqjar qalalaryna gastroldik sapar jasaıdy.
Teatrdyń dırektory jáne kórkemdik jetekshisi Esmuhan Obaevtyń aıtýynsha, óner ujymy óz repertýarynan tarıhı jáne búgingi kún taqyrybynan alty spektakl alyp barmaq. Olar - M.Áýezovtiń «Abaı» tarıhı dramasy, B.Jákıevtiń «Júreıik júrek aýyrtpaı...», M.Sársekeniń «Tenderge túsken kelinshek» dramalary, I.Saparbaıdyń «Syǵan serenadasy» mıýzıkli, N.Gogoldiń «Úılený» komedııasy men Ǵ.Músirepovtiń «Mahabbat dastany» tragedııasy.
Onda óner súıer qaýym Aıdos Bektemir, Ráshıda Hadjıeva, Qymbat Tileýova, Bekjan Turys, Omar Qıqymov, Azat Seıitmetov, Jolaman Ámirov, Merýert Omarbekova, Darııa Júsip, Erlan Bilálov, Jalǵas Tolǵanbaı, Dýlyǵa Aqmolda, Asylbek Boranbaı, Shynar Janysbekova, Nazgúl Qarabalına, Azamat Satybaldy, Gúlnur Shyńǵysova, Lázzat Qaldybekova, Berik Aıtjanov, Erkebulan Daıyrov, Talǵat Saǵyntaev, Qýanysh Mamytqalıev, Jasulan Baısalbekov, Almas Shaıahmetovterdiń oıynyn tamashalaı alady.
«Búginde biz aıyna 30-35 spektakl qoıatyn Qazaqstandaǵy jalǵyz teatrmyz. Óıtkeni bizde eki zal bar. Búgin D.Kobýrnnyń «Jyn oınaq» tragıkomedııasynyń premerasy jáne Medeý Sársekeniń «Tenderge túsken kelinshek» pesasy qoıylyp otyr. Teatrda 4 býyn ókilderi jumys isteıdi. Aldy 95-ke kelgen Habıba Elebekovadan bastap, 80-degi Zámzágúl Sháripova men búgingi teatr aqsaqaly Sábıt Orazbaev pen Asanáli Áshimovterdiń trýppalary», - deıdi Qazaqstannyń halyq artısi E.Obaev. Onyń aıtýynsha, gastroldik sapardan keıin óner ujymy bıylǵy teatr maýsymy aıaqtalǵansha Iran Ǵaıyptyń, Dýlat Isabekovtiń, Tólen Ábdikovtiń, Raqymjan Otarbaevtyń jáne Anton Chehovtyń jańa týyndylary qoıylmaq.
