Qazaqtyń qyzy óz merekesin álemdik sporttyń kóshbasshylary arasynda qarsy alýǵa múmkindik aldy
ASTANA. QazAqparat - Shveıtsarııanyń Lozanna qalasynda Halyqaralyq Olımpıada komıtetiniń uıymdastyrýymen sporttaǵy áıelder máselesine arnalǵan xalyqaralyq forým ótip jatyr. Sharaǵa alǵash ret Qazaqstannyń ókili qatysýda, dep xabarlaıdy QazAqparat tilshisi Qazaqstannyń boks federatsııasyna silteme jasap.
Forýmnyń negizgi maqsaty - sporttaǵy basshylyq qyzmetterge, sonyń ishinde menedjment pen koýchıngke áıelderdi keńinen tartý. Osy taqyrypqa arnalǵan pikirtalastarǵa álemniń túkpir-túkpirinen kelgen 60-tan astam sportshy men sarapshy mamandar qatysýda. Olardyń ishinde HOK Bas dırektory Krıstof de Kepper, ASOIF prezıdenti Franchesko Rıchchı Bıttı, BBC Sport dırektory Barbara Slater, Halyqaralyq kúres federatsııasynyń basshysy Nenad Lalovıch, Halyqaralyq aýyr atletıka federatsııasynyń prezıdenti Tamash Aıan bar. Bıylǵy forýmǵa alǵash ret Qazaqstannyń atynan otandyq boks federatsııasynyń úılestirýshisi, AIBA áıelder komıssııasynyń múshesi Dınara Bolatbekqyzy qatysyp jatyr.
«Bul jerde biz kommýnıkatsııalar men tálimgerlik boıynsha ózara tájirıbe almasyp jatyrmyz. Máselen, xalyqaralyq koých Gabrıela Mıýller bizge sporttyń barlyq deńgeılerine áıelderdi keńinen tartýdyń ádis-tásilderin kórsetti. Atalǵan shara - Halyqaralyq Olımpıada komıteti men jazǵy Olımpıada boıynsha xalyqaralyq federatsııalar qaýymdastyǵynyń (ASOIF) birlesken bastamasy. Dál osy áriptestiktiń arqasynda genderlik saıasattyń biraz máselelerin sheshýge bolady. Men úshin atalǵan sharaǵa qatysý - úlken abyroı. Tomas Baxtyń jeke shaqyrýyn alǵanyma óte qýanyshtymyn. Bıylǵy 8 naýryz merekesi men úshin erekshe sıpatta ótýde. Ol meıramdy HOQ basshylyǵy men kóshbasshy áıelderdiń arasynda qarsy alatynyma qýanyshtymyn», - deıdi Dınara Bolatbekqyzy.
Erteń, naýryzdyń 8-i kúni forýmǵa qatysýshylardyń aldynda HOK prezıdenti Tomas Bax sóz sóıleıdi.
