Qazaqtyń kúıleri rýhanı tutastyǵymyzdy bildiredi - Prezıdent
«Rýhanı jańǵyrý baǵdarlamasy arqyly ulttyq mádenıetimizdi álemge tanytýǵa dombyra erekshe úles qosady. Qurmanǵazy men Dáýletkereıdiń, Táttimbet pen Súgirdiń, Qazanǵap pen Dınanyń kúıleri tól mádenıetimizdiń biregeı úlgileri. Keshegi aramyzdan ótken Nurǵısa Tilendıev dombyra arqyly óziniń óshpes ónerin qaldyrdy. Olardyń barlyǵy urpaqtan-urpaqqa jalǵasyp, halyqtyń jadynda saqtalyp keledi. ıÝNESKO sheshimimen dombyra men kúı adamzattyń materıaldyq emes mádenı muralarynyń tizimine endi. Elimizde qasıetti qara dombyraǵa degen qurmet eshqashan tómendegen emes. Osydan biraz jyl buryn Astanada kúı atasy Qurmanǵazynyń eskertkishi boı kóterdi. Almatyda áıgili Nurǵısa Tilendıevtiń eńseli eskertkishi ornatyldy. Osynyń bári dombyra men kúı ónerimen ǵasyrlar boıy dalamyzdy sazben terbetken kúıshilerdi qadirleýdiń kórinisi», - dep toqtaldy Elbasy.
Sondaı-aq, Memleket basshysy dombyra qazaq úshin jaı ǵana mýzykalyq aspap emes, odan áldeqaıda bıik turǵan kıeli qundylyq ekenin atap ótti.
«Halqymyz dombyraǵa úki taǵyp, tórine ilgen. Kúıshilerdi tóredeı kútip, tóbesine kótergen. Osy ıgi úrdis qazir de jalǵasyp keledi. Búgin «Qazaq Eli» alańyna jınalǵan myńdaǵan kúıshi osynyń aıqyn kórinisi. Rýhanı jańǵyrýǵa bet burǵan halqymyz qasıetti dombyra men qudiretti kúıdi qazaq qanshalyqty qadirleıtinin búkil elimizge, barsha álemge pash etip otyrmyz. Osy jerde kúmbirlegen kúıler bizdiń biregeıligimiz ben rýhanı tutastyǵymyzdy bildiredi. Ylaıym ár ýaqytta elimizge Jaratqan birlik bersin. Búgingi shara óskeleń urpaqtyń qasıetti dombyraǵa, ulttyq ónerge degen qulshynysyn arttyra túsedi dep bilemin. Ulttyq dombyra kúni barshamyzǵa qutty bolsyn!», - dep quttyqtaýyn jetkizdi Prezıdent.
Budan buryn habarlanǵandaı, Elbasy 2 myńnan astam dombyrashynyń ónerin tamashalady.
Sonymen qatar Memleket basshysy dombyra - qazaqtyń brendi men pasporty ekenin atap ótti.
