Qazaqtyń kúı óneri dúldúlderiniń biri Qarshyǵa Ahmedııarov 65 jasqa qaraǵan shaǵynda dúnıeden ozdy
ASTANA. Maýsymnyń 7-si. QazAqparat - Qazaqtyń qazynasy - qudyretti kúı óneri dúldúlderiniń biri dombyrashy, Qazaqstannyń halyq ártisi Qarshyǵa Ahmedııarov 65 jasqa qaraǵan shaǵynda dúnıeden ozdy. Qazaq mádenıeti orny tolmas qazaǵa dýshar boldy.
Atyraý oblysynyń Mahambet aýdanynda dúnıege kelgen kúıshi Almaty memlekettik konservatorııasyn bitirgen. Qurmanǵazy atyndaǵy qazaq akademııalyq halyq aspaptar orkestrinde dombyrashy, keıinnen kontsertmeıster, jeke dombyrashy jáne dırıjer qyzmetterin atqarǵan. 1974 jyldan Almaty memlekettik konservatorııasynda pedagogtyq qyzmetpen shuǵyldanyp, ǵylymı-zertteý jumystarymen aınalysqan.
Q.Ahmedııarov «Shashaqty naıza, shalqar kún», «Ásemqońyr», «Saryarqa», «Jiger», «Atyraý» kúıler jınaǵy kitaptaryn jarııalady. Ol taqyryby jáne stıli jaǵynan ártúrli 50-den asa kúı shyǵarǵan. Onyń ishinde jaqyn, súıikti adamdaryna arnaǵan «Qaıran áke», «Aq qaıyń», «Saǵynysh», zamandastaryna arnaǵan «Ǵazıza», «Bı», «Qýanysh», «Shamǵon Aqjeleń», «Nurǵısa», ótkenniń ór tulǵalaryna arnalǵan «Abaı tolǵaý», «Qurmanǵazy», «Aqjeleń» kúıleri bar. «Jańa jyl», «Shabyt», «Osaka» t.b. kúıleri syrly sezimdi sýrettese, «Altyn uıa», «Qurdastar», «Naryn», «Aqjaıyq» , «Atyraý», «Atameken» týyndalary qoǵamdyq órkenıetke, týǵan jer taqyrybyna arnalǵan.
Qarshyǵa Ahmedııaruly - jan-jaqty iri mýzykant, qaıtalanbas dara tarlan talant ıesi boldy. Onyń mýzyka óneri salasyndaǵy búginge deıingi jetken jetistigi - kim-kimge de úlgi-ónege, keler jas urpaqtarǵa arnalǵan asyl mura bolyp qala bermek.
