Qazaqtyń qoıy Qytaıǵa tasymaldanady
ASTANA. QazAqparat - QR Premer-Mınıstri - Aýyl sharýashylyǵy mınıstri Asqar Myrzaxmetovtyń Qytaı Halyq Respýblıkasyna jasaǵan jumys sapary barysynda taraptar Qazaqstannyń qoı etin qytaılyqtarǵa tasymaldaý jóninde kelisimge keldi, dep xabarlaıdy QazAqparat tilshisi.
«Búginde Qytaı naryǵyna taýar tasymaldaý úshin arnaıy ónimniń talapqa saı ekenin dáleldeý kerek. Ol úshin arnaıy organ bar. Oǵan álemniń 100-den astam elinen myńdaǵan ótinimder túsedi. Alaıda Qazaqstannyń ótinimderi birinshi kezekte qaralady. Sebebi memleket basshylary deńgeıinde tıisti ýaǵdalastyq bar. Al Myrzaxmetov myrzanyń jasaǵan sapary barysynda eki jaq 30 shaqty ónimniń buǵan deıingi ótinimderin toptastyrýǵa kelisti. Máselen, maıly daqyldar ortaq bir xattama boıynsha rásimdeledi. Demek, ol ónimderdiń ınspektsııasy da birden júrgiziledi», - dedi Aýyl sharýashylyǵy vıtse-mınıstri Gúlmıra Isaeva búgin Úkimet úıinde ótken baspasóz máslıxatynda.
Vıtse-mınıstrdiń aıtýynsha, aǵymdaǵy aıdyń sońynda Qytaıdyń ınspektsııasy Qazaqstanǵa kelip, azyq-túlik qaýipsizdigi júıesin baǵalaıtyn bolady. Sol kezde qoı etin óńdeıtin otandyq kásiporyndarǵa da tekseris júrgiziledi.
«Osy joly da qytaılyq áriptester ol tekseristerdiń bólek júrgiziletinine qaramastan, ekeýin de birdeı ótkizýge kelisti. Osynyń arqasynda Qazaqstannyń qoı etin Qytaıǵa erterek eksporttaýǵa bolady. Bizdiń josparymyzǵa sáıkes, aǵymdaǵy jyldyń ekinshi jartyjyldyǵynda qazaqtyń qoı eti kórshi elge tasymaldanady», - dep atap kórsetti vıtse-mınıstr.
