Qazaqtyń qonaqjaılylyǵy ózge ult ókilderiniń ómirin saqtap qaldy - Dmıtrıı Matsıýk
AQTÓBE. QazAqparat - Qazaq halqynyń qonaqjaılylyǵy pana izdegen birneshe ult urpaǵynyń úzilmeýine septigin tıgizdi. Qazaq halqyna tán osy qasıet el ishindegi bereke-birlikti saqtap otyr. Osyndaı pikirin fılosofııa ǵylymdarynyń kandıdaty Dmıtrıı Matsıýk bildirdi, dep habarlaıdy QazAqparat tilshisi.
Aqtóbe oblysynda Alǵys aıtý kúnine oraı birneshe mádenı-aǵartýshylyq sharalar ótip jatyr. Balabaqshalar men mektepte balalar ustazdaryna, ata-analaryna jáne bir-birine alǵys aıtyp, ystyq lebizderin bildirýde. Al Qazaqstan halqy Assambleıasynyń Aqtóbedegi ókildigi stýdenttermen, oqýshylarmen kezdesip, atalmysh merekeniń mán-mańyzyn túsindirdi.
«Alǵys aıtýdyń túp-tamyry Soltústik Amerıkadan taraıdy. Anglııadan jer aýdarǵandar 1620 jyldary Soltústik Amerıkaǵa barady. Jer aýdarýshylar kúzde alǵashqy ónimin jınap, mereke uıymdastyryp, ózderin qanatynyń astyna alǵan úndilikterdi qonaqqa shaqyrady. Sodan beri AQSh, Kanadada alǵys aıtý kúni toılanady. Sol sekildi Qazaqstan da jer aýdarǵan ulttardyń Otanyna aınaldy. HH ǵasyrdyń 20-50-jyldary Stalındik repressııaǵa ushyraǵandar qazaq jerine qonystanyp, turaqtady. Keıbiri tarıhı Otanyna oralǵanymen, basym bóligi Qazaqstanda qaldy. Olar otbasyn qurdy, qazaq jerine sińisip ketti. Munda sheshen, nemis, koreı, túrik halqy kóp shoǵyrlandy. Mine, osy ult pen ulys qazaq halqyna alǵys aıtady», - dedi fılosofııa ǵylymdarynyń kandıdaty Dmıtrıı Matsıýk.
Merekeniń mańyzy men mánine toqtalǵan ustaz bul kúni bir-birine oıy men sezimin ashyq bildirip, alǵys aıtýǵa bolatynyn jetkizdi. Sondaı-aq ózge ult ókilderi qazaq halqyna óz rızashylyǵyn bildirip jatyr.
«Qazaq halqy qonaqjaılylyq tanytyp, jer aýdarǵandardy qarsy aldy. Shyn máninde qazaqtyń qonaqjaılylyǵy pana izdep kelgen adamdardyń ómirin saqtap qaldy dep aıtýǵa bolady. Ultaralyq, konfessııaaralyq kelisim bar, jyl ótken saıyn birligimiz nyǵaıyp keledi. Sondyqtan bul kúnniń salmaǵy úlken, máni zor», - dedi Dmıtrıı Matsıýk.
