Qazaqtyń kilemderinde kezdesetin belgi-sımvoldar 2,5 myń jyl buryn toqylǵan kilemderde dálme-dál kezdesedi - J.Qurmanǵazıev
ASTANA. Jeltoqsannyń 9-y. QazAqparat /Gúlmıra Álıakparova/ - Apa-ájelerimiz osydan 2,5 myń jyl buryn qoldanylǵan sımvoldardyń maǵynasyn tereń túsingen. «Úıde qut-bereke bolsyn», - dep, olardy toqyǵan kilemderine túsirip joǵary ilgen. Bul oıyn búgin Astanada Beıbitshilik jáne kelisim saraıynda «Qazaqstanda kilem toqý óneriniń bolashaǵy bar ma?» taqyrybynda ótken semınarda oıý-órnekterdi zertteýshi Járdem Qurmanǵazıev bildirdi,
dep habarlaıdy QazAqparat.
J.Qurmanǵazıevtiń aıtýynsha, Bozaryq qoryǵynda júrgizilgen qazba jumystary kezinde osydan 2,5 myń jyl buryn toqylǵan eń ejelgi kilemderdiń qaldyqtary tabylǵan. Olar qazir Sankt-Peterbordaǵy «Ermıtajda» saqtaýly. «Eń qyzyǵy,- deıdi ol, - sol kezdegi kilemderde qoldanylǵan belgi-sımvoldar qazirgi qazaq kilemderinde dálme-dál kezdesedi.
«Bul - kilem toqý óneriniń 2,5 myń jyl boıy urpaqtan-urpaqqa berilip kele jatqanynyn belgisi. Apa-ájelerimiz olardyń tereń maǵynasyn bilgen jáne úıde qut-bereke bolsyn, - dep kilemderine túsirip otyrǵan», - dedi ol.
Zertteýshiniń aıtýynsha, qazirgi urpaq ta kilemderde qoldanylǵan jáne qoldanylyp kele jatqan oıý-órnekterdiń mán-maǵynasyn túsinýi qajet. Máselen, qazaqtyń barlyq derlik kilemderinde kezdesetin «qoshqar múıiz» oıýy, onyń pikirinshe - taý ishinen shyǵyp kele jatqan adamdy beıneleıdi. Sol sııaqty «romb» tárizdi belgiler - pıramıdanyń ústinen qaraǵandaǵy kórinisti beredi. ıAǵnı bul - taýlar, al taýlar - atam-zamannan beri uly tulǵalar, belgili qolbasshylar taǵdyrynda mańyzdy rólder atqarǵan.
