Qazaqtyń kıiz úıi «Han shatyr» keshenin salýǵa negiz bolǵan basty elementterdiń biri - qurylys kompanııasynyń Bas dırektory
ASTANA. Shildeniń 6-sy. QazAqparat /Aıdar Ospanalıev/ - «Han shatyr» keshenin salýda biz basty baǵyt etip, aýa raıy qatal elordada jergilikti halyqtyń jáne onda kelgen qonaqtardyń demalýlaryna,
odan keremet lázzat alýlaryna qajetti jaǵdaı jasaýdy basty baǵyt etip ustadyq», deıdi nysandy turǵyzǵan «Sembol» qurylys kompanııasynyń Bas dırektory Aıtekin Gúltekin. Bul týraly ol búgin atalmysh keshenniń aıaqtalýyna baılanysty jýrnalıstermen bolǵan baspasóz máslıhatynda málim etti.
Bas dırektordyń aıtýynsha, elordada qys mezgilinde basqany qoıǵanda kóshe kezip júrýdiń ózi múmkin emes sýyqtar bolady. «Han shatyr» sııaqty alyp keshendi salý arqyly biz osy olqylyqtyń ornyn jabýǵa tyrystyq. Bul halyqtyń áleýmettik qajettiligine oraı dúnıege kelgen joba. Ony júzege asyrý barysynda qazaqtyń salt-dástúrimen baılanysty qundylyqtar nazarǵa alyndy. Mysaly qazaqtyń kıiz úıi jobaǵa negiz bolǵan basty elementterdiń biri. Keshen 130 myń sharshy metr aımaqty alyp jatyr. Onyń qurylymy álemniń birde-bir memleketinde joq», dedi Bas dırektor.
Sondaı-aq onyń sózine qaraǵanda, keshendi áleýmettik joba deýge bolady. «Basqasha aıtqanda biz qalanyń ósip gúldenýine ǵana emes, ondaǵy halyqtyń áleýmettik ómiriniń ońalýyna da úles qosyp otyrmyz. Keshendi salýda biz oǵan kelýshilerdi joǵarǵy nemese tómengi topqa arnalǵan dep jikke bólgen joqpyz. Bul jalpy halyqqa arnalǵan dúnıe», dedi kompanııa basshysy.
Onyń aıtýynsha, osy ýaqytqa deıin elordada «Rıksos» oteli, Táýelsizdik saraıy, «Astana -arena» stadıony, Nazarbaev ýnıversıteti sııaqty iri keshenderdi salǵan «Sembol» kompanııasynyń ókilderi elordada qysqy Azııa oıyndaryna qajetti konkımen syrǵanaýǵa arnalǵan stadıondy daıyndap jatyr. Sonymen qatar atalmysh kompanııa áskerı akademııa ǵımaratynyń qurylysy boıynsha daıyndyq jumystaryn júrgizýde.
