«Qazaqtyń qazanatyna qashan qol jetkizemiz?» - respýblıkalyq basylymdarǵa sholý

***

«Tarıh qoınaýyna bet alǵan 2010 jyl elimiz úshin erekshe bolǵany jasyryn emes. Osy oraıda jyldaǵy dástúr boıynsha ózge de agenttikterdiń qatarynda Qurylys jáne turǵyn úı-kommýnaldyq sharýashylyq isteri agenttigi men «Samuryq-Qazyna» jyljymaıtyn múlik qory» AQ ta óz mindetteri men qyzmetteriniń qorytyndysyn jarııalady. Oǵan Premer-Mınıstr Kárim Másimov qatysty», dep jazady «Egemen Qazaqstan» gazeti búgingi nómirinde.

Basylymnyń atap ótýinshe, aldymen «Samuryq-Qazyna» ulttyq ál-aýqat qory» AQ-tyń atqarýshy dırek­tory Qaırat Áıte­kenov, «Turǵyn-úı-kommýnaldyq sharýashyly­ǵyn jańǵyrtý men damytýdyń qazaq­standyq ortalyǵy» AQ basqarma tóraǵa­sy Zınýlla Qazıev, Qurylys jáne turǵyn úı-kommýnaldyq sharýashylyq isteri agenttigi tóraǵasy Serik Nokın baıandamalar jasaǵan. Elimizdegi turǵyn úı qurylysynyń 2008-2010 jyldarǵa arnal­ǵan memlekettik baǵdarlamasynyń iske asyrylýyn qorytyndylaǵan S.Nokınniń atap ótýinshe, turǵyn úıdiń shamamen 19,6 mln. sharshy metri, onyń ishinde 2010 jyly 6,4 mln. sharshy metri paıdalanýǵa berilgen. Bul sandar Úkimettiń daǵdarysqa qarsy baǵdar­lamalarynyń arqasynda turǵyn úıdiń jańa alańdaryn paıdalanýǵa berý kóleminiń kúrt tómendeýine jol berilmegen­diginiń aıqyn dáleli. Sondaı-aq ol elimizdiń 2010-2014 jylǵa arnalǵan memlekettik úde­meli ındýstrııalyq-ınnovatsııalyq damý baǵ­darlamasy sheńberinde jalǵa beriletin turǵyn úıdi odan ári damytýǵa nıetti ekenin jáne turǵyn úı qurylysyn damytý qarqynyn saqtaýǵa múmkindik beretin tetiktiń biri turǵyn úı qurylys jınaqtary júıesin damytý bolyp tabylatynyn atap ótken. Bul jaıynda tolyǵyraq basylymnyń juma kúngi nómirindegi «Qurylys isine qunttylyq qajet» degen maqaladan bile alasyzdar.

«Egemen Qazaqstan» gazetiniń jazýynsha, keshe Memleket basshysy Nursultan Nazarbaev QR Baılanys jáne aqparat mınıstri Asqar Jumaǵalıevti qabyldady. A. Jumaǵalıev Memleket basshysyna mınıstrliktiń 2010 jylǵy qyzmetiniń negizgi qorytyndylary týraly, sonyń ishinde 3G úshinshi býyn uıaly baılanystyń standartyn engizý jóninde, aýylda keń jolaqty ınternetti damytý jónindegi jobany iske asyrýǵa daıyndyq jumystaryn júrgizý týraly, sandyq telehabarlardy iske qosý jáne elektrondy úkimet portaly arqyly 1 mln. 600 myńnan astam elektrondyq anyqtama berilgeni týraly, sondaı-aq 2011 jylǵa josparlanǵan mindetter týraly baıandady. Kezdesýdiń qorytyndysy boıynsha Memleket basshysy Qazaqstannyń aqparattyq-kommýnıkatsııalyq salasyn halyq pen bıznes ókilderi úshin memlekettik qyzmet kórsetý spektrin keńeıtý, sandyq telehabarlardy damytý, eldi mekenderde keń jolaqty Internet jelisine qol jetimdilikti jáne aqparattyq keńistiktiń básekege qabilettiligin arttyrý bóliginde damytý jóninde birqatar tapsyrmalar berdi.

***

«Aıqyn» gazetiniń búgingi nómirinde dástúrli «Aq sóıle!» aıdarynda QR Parlament Májilisi Tóraǵasynyń orynbasary Jánibek Káribjanovtan alynǵan suhbat jarııalandy. Onda qoǵamdaǵy birqatar ózekti máseleler sóz bolǵan. «Halyq - synshy, Nazarbaevtyń eldi áıteýir bir dańǵyl jolǵa túsiretinine sendi. Senim údesinen shyqqan Elbasy el tizginin ustaǵan 1991 jyldyń 1 jeltoqsanynan bergi jerde ekonomıkaǵa tótennen, syrttan kılikken jahandyq daǵdarystyń da aldyn alý, betin qaıtarý amaldaryn izdestirip, tosqaýyl qoıa bildi. Toqsanynshy jyldardyń aıaǵyndaǵy daǵdarystan aman alyp qaldy. Nazarbaevtyń daǵdarystan shyǵarý ádisterine, memleket qurýdaǵy tájirıbesine búginderi kóptegen irgeli elderdiń erekshe den qoıyp otyrǵany sondyqtan», - degen basylym tilshisiniń suraǵyna bergen jaýabynda J. Káribjanov. Suhbat «Biz tańdap alǵan jol da, maqsat ta aıqyn» degen taqyryppen berilgen.

«Uıǵyr aýdanyndaǵy Sharyn aýylynyń turǵyndary eldi meken attas ózenniń arnasynyń buzylýy saldarynan jaǵaǵa shyǵyp ketken muz aralas alapat sýdan zardap shekkeninen jurt jaqsy qulaǵdar. Tasqyn bolǵan kúnniń erteńinen bastap sol jerden tabylǵan Almaty oblysy ákiminiń birinshi orynbasary, oblystyq tótenshe jaǵdaılar jónindegi komıssııanyń tóraǵasy Amandyq Batalov pen oblystyq tótenshe jaǵdaılar jónindegi qyzmetterdiń jetekshileri jurttyń jaǵdaıyna túsinistikpen qarap, jedel shtab quryp, naqty kómekter uıymdastyrýdy qolǵa aldy», - dep jazady «Aıqyn» gazeti juma kúngi sanyndaǵy «Qyzylaǵash qasireti nege sabaq bolmady?» degen maqalasynda.

Basylymnyń atap ótýinshe, joǵary jaǵy buǵaýlanyp, álemdegi eń iri sý elektr stansalarynyń biri Moınaq salynyp jatqan Sharyn ózeniniń doly aǵysy sonaý jyldary jolaýshylar avtobýsyn da aǵyzyp ketkenin, Raıymbek aýdanyn ortalyqpen biraz ýaqyt qatynassyz qaldyrǵanyn jurt áli umyta qoıǵan joq. Sondyqtan ózenniń bul jolǵy minezin beıqamdyqqa qarsy jasalǵan eskertý dep qabyldaǵan jón.

***

Aǵylshyndyq ǵalymdardyń «jylqy maly alǵash ret qazaq jerinde qolǵa úıretilgen» degen sensatsııalyq jańalyǵy jarııa bolǵanda, júrek jarylardaı qýanǵanymyz ras. Osyny aıtyp maqtanǵanda, aýyzdyǵa sóz bermeımiz, alaıda ataq-dańqymyzdy asyrǵan ata-baba kásibiniń qadirine jete almaı júrmiz-aý... Áıtpese qazaqtyń kúlli álemdi tamsandyrǵan qazanattary qaıda ketken? Bul jaıynda «Alash aınasy» gazetiniń búgingi nómirindegi «Qazaqtyń qazanatyna qashan qol jetkizemiz?» degen maqalada keńinen baıandalǵan. «Jylqy jandy halyqtyń jerinde kıeli janýardy zerttep, asyltuqymdy tulparlardy jan-jaqty zerdeleıtin arnaıy ǵylymı ortalyq bolsa ıgi edi. Biraq ózimiz kıe tutatyn qasıetti Qambar ataǵa mundaı ıgilikti qımaı otyrmyz. Qazaqtyń qazanatyn qaıta jańǵyrtý jolyndaǵy bar jaýapkershilik Qostanaıdaǵy «Qazaq tulpary» zaýytynyń quramyndaǵy shaǵyn ǵana zerthanaǵa júktelgen. Jáne bul zerthana salmaǵy aýyr mindettemeni abyroımen oryndap kele jatqany kóńil kónshitkenimen, aty ańyzǵa aınalǵan qazaqtyń qanatty tulparlaryna qaıta qol jetkizý úshin elimizde «Qazaq ǵylymı zertteý jylqy ınstıtýtyn» ashatyn mezgil jetti deıdi mamandar», dep jazady basylym.

«Ortalyq saılaý komıssııasy 5 mıllıon 16 myń azamattyń qolyn rastady». Osy taqyryppen «Alash aınasy» gazetinde jaryq kórgen maqalada Elbasynyń ókilettiligin uzartý máselesimen respýbılkalyq referendým taǵaıyndaý týraly shyǵysta bastalǵan bastama búkil elimiz boıynsha qoldaý taýyp, qajetti qol 200 myń emes, 5 mıllıonnan asyp ketkendigi jaıynda jazylǵan. Bastamashyl top ótkizgen osy qoldardyń rastyǵyn teksergen Ortalyq saılaý komıssııasy keshe sońǵy nátıjeni jarııa etken. «2011 jylǵy 13 qańtardaǵy jaǵdaı boıynsha, Ortalyq saılaý komıssııasyna barlyq oblystyq, Astana jáne Almaty qalalyq saılaý komıssııalarynyń qoldardy tekserý nátıjeleri týraly hattamalary kelip tústi. Respýbılkalyq referendým ótkizý týraly bastamashyldyqty qoldap, barlyǵy 5 mıllıon 16 myń qol jınalǵan nemese respýblıkalyq referendýmǵa qatysýǵa quqyǵy bar Qazaqstan Respýblıkasy azamattarynyń jalpy sanynyń 55,2 paıyzy», - delingen maqalada.

***

«Keshe Memleket basshysy Nursultan Nazarbaev Ulttyq Banktiń Tóraǵasy Grıgorıı Marchenkony qabyldady», - dep jazady «Kazahstanskaıa pravda» gazeti. Basylymnyń atap ótýinshe, G. Marchenko Prezıdentke 2010 qarjylyq jyldyń aldyn ala qorytyndylary týraly baıandaǵan.

«Jalpy alǵanda makroekonomıkalyq jaǵdaı turaqty. Ótken jyly ınflıatsııa boljamdy dáliz aıasynda 7,8 paıyzdy qurady. Memleket basshysy Úkimetpen jáne Qarjy naryǵyn jáne qarjy uıymdaryn retteý men qadaǵalaý agenttigimen birlesip ekonomıkanyń naqty sektoryn bankter tarapynan kredıtteýdi yntalandyrý ádistemesin ázirleýdi tapsyrdy, - dep atap kórsetken brıfıngte Ulttyq Banktiń Tóraǵasy.