Qazaqtyń Qazaqstannan basqa Otany joq - Saparbaev
AQTÓBE. QazAqparat - Aqtóbe oblysy Alǵa qalasynyń turǵyndaryn qonys toıymen quttyqtaǵan oblys ákimi Berdibek Saparbaev táýelsizdiktiń qadirin túsinýge shaqyrdy, dep habarlaıdy QazAqparat tilshisi.
Aqtóbe oblysy Alǵa qalasynda 5 qabatty eki turǵyn úı salynyp jatyr. 120 páterli úı kezekte turǵan adamdarǵa tıesili. Qurylys jumystary jyl sońyna deıin aıaqtalyp, 60 otbasy páterli bolady. Al ekinshi kópqabatty úı keler jyly paıdalanýǵa beriledi. Munda avtonomdy jylytý qazandyǵy qarastyrylǵan. Ortalyqtandyrylǵan sý qubyry tartyldy. Qazirgi kezde ishki árleý jumystary júrip jatyr. Aýdandaǵy qurylyspen tanysqan óńir basshysy Berdibek Saparbaev 8 otbasyǵa arnalǵan páterdiń kiltin tabys etti.
«Adam úshin, otbasy úshin eń negizgisi páter. Sondyqtan Elbasy Nursultan Nazarbaev turǵyn úı salýǵa úlken kóńil bólip keledi. Tek Aqtóbe oblysynda jyl aıaǵyna deıin 700 myń sharshy metr páter beriledi. Bul 7 myńǵa jýyq otbasy baspanaly bolady degen sóz. «Nurly jer» baǵdarlamasy Aqtóbe qalasynda iske asyrylyp jatyr. Áleýmettik qoldaýdy qajet etetin adamdarǵa memleket esebinen páter berý kerek. Sondyqtan Aqtóbe qalasynda 4 turǵyn úıdiń qurylysy júrip jatyr. Mundaı jumys aýdandarda da júredi», - dedi oblys ákimi Berdibek Saparbaev.
Páterli bolǵan otbasylarǵa qutty bolsyn aıtqan óńir basshysy táýelsizdiktiń baǵyn bilýge, jastardy el úshin eńbek etýge shaqyrdy.
«Barlyǵy táýelsizdiktiń arqasynda. Biz sony esh ýaqytta umytpaýymyz kerek. Qazaqtyń Qazaqstannan basqa Otany joq. Bizdiń Otanymyz - osy. Tatarlar, uıǵyrlar, kúrtterge qarasaq, olardyń sany bizden áldeqaıda kóp. Biraq olardyń biz sııaqty egemen, táýelsiz memleketi joq. Táýbe dep aıtýymyz kerek. Árbir qazaq, árbir Qazaqstan azamaty táýelsizdiktiń tuǵyrly bolýy, damýy, bolashaǵy úshin eńbek etýi kerek. Sol kezde ósip kele jatqan urpaǵymyz rızashylyǵyn bildiredi», - dedi B.Saparbaev.
Qazirgi kezde Alǵa qalasynda 1500-den astam adam páter kezeginde tur. Olardyń arasynda jas, kópbalaly otbasylar bar.
«Kúıeýim jetim ósken. Biz 10 jyldan beri páter kezeginde turmyz. Qazir úsh balamyz bar. Ol vahtalyq ádispen jumys isteıdi, al ózim bala kútimimen úıde otyrmyn. Búgingi kúnge jetkenime qýanyshtymyn. Endi bizdiń eki bólmeli páterimiz bar», - dedi qonys toıyn toılaǵan Gúljanat Elamanova.
