Qazaqtyń qaıratker áıelderi týraly entsıklopedııa jaryq kórdi
ALMATY. QazAqparat – Almatyda halqymyzdyń qaıratker áıelderi týraly entsıklopedııa jaryq kórdi, dep habarlaıdy QazAqparat tilshisi.
«Ulttyń ulaǵatty uıasy» atty anyqtamalyq-tanymdyq jınaq Qazaq ulttyq qyzdar pedagogıkalyq ýnıversıtetiniń bastamasymen shyqty.
Kitapta elimizdegi pedagog kadrlaryn daıarlaıtyn irgeli ortalyqtyń biri – Qyzdar ýnıversıtetiniń elimizdiń ǵylym, bilim berý jáne mádenıet salasynda eleýli eńbek etip júrgen túlekteriniń azamattyq kelbeti, olardyń atqarǵan qyzmetteri men ıgilikti isteri keńinen baıandalǵan.
«Jınaqta oqý ornynda atqarylǵan aýqymdy jumystar men jetistikter de toptastyrylǵan. Kitap «Tarıh. Tanym. Tarazy», «Parasat mektebi: búgini men bolashaǵy», «Tulǵalar», «Ǵalymdar», «Ustazdar» jáne «Aqyn-jazýshylar, mádenıet salasynyń qyzmetkerleri» atty bólimderden turady. Azamattyq kelbetteri oqyrman nazaryna usynylǵan túlekterdiń qatarynda Kúlásh Qunantaeva, Shámsha Berkimbaeva, Orazkúl Asanǵazy, Asyly Osman, Aqushtap Baqtygereeva syndy memleket jáne qoǵam qaıratkerleri bar», – dep atap ótti kitaptyń qurastyrýshysy ári bas redaktory Jandar Asan.
