Qazaqtyń «Qańbaq shaly» Pragada ótken festıvalde bas júldeni jeńip aldy
ALMATY. Maýsymnyń 17-si. QazAqparat /Erbol Azanbek/- Qazaq ertegisiniń jelisimen qoıylǵan «Qańbaq shal» qoıylymy Chehııa astanasy Pragada ótken XIV dúnıejúzilik qýyrshaq teatrlary festıvalinde bas júldege ıe boldy.
Atalǵan festıval 31 mamyr - 6 maýsym aralyǵynda Dúnıejúzilik qýyrshaqshylar qaýymdastyǵynyń uıymdastyrýymen ótken bolatyn. Festıval - qýyrshaq janry ónerindegi eń basty oqıǵalardyń biri bolyp tabylady. Basty maqsaty - álemdegi qýyrshaq sheberleri arasynda shyǵarmashylyq baılanys ornatý, sımpozıýmdar, konferentsııalar jáne basqa da osy janrdyń damýyna arnalǵan sharalar ótkizýge baǵyttalǵan. 14 jyl boıy ótip kelgen festıvalge bıyl álemniń 28 elinen 38 óner ujymy qatysqan. Qazaqstan atynan Almaty qalalyq memlekettik qýyrshaq teatry «Qańbaq shal» qoıylymymen eki atalym boıynsha qatysqan edi. Festıval qorytyndysy boıynsha «Qańbaq shal» qoıylymy «Úzdik teatr dekoratsııasy jáne qýyrshaq dızaıny» atalymy boıynsha bas júldege laıyq dep tanylǵan.
Teatrdyń dırektory, QR eńbek sińirgen qaıratker Mádenıet ıÝsýpovtyń aıtýynsha, japondyq Merı Bod, aljırlik Meda Sıda Ahmed syndy qýyrshaq óneriniń alpaýyttary bastaǵan ádilqazylar bas júldeni tabystaı otyryp, qazaqstandyq akterlerdiń sheberligin, qazaq mýzykasynyń keremettigin erekshe atap ótken.
Endi qazaqstandyq teatr keler jyly atalǵan festıvaldiń barlyq jyldardaǵy jeńimpazdarynyń basyn qosqan mereıtoılyq sharaǵa qatysady.
