Qazaqtyń halyq ertegileriniń jelisi boıynsha túsirilgen anımatsııalyq mýltfılmder jınaǵy jaryq kórdi

Ony ákimdiktiń tilderdi damytý, muraǵattar jáne qujattama basqarmasy QR Tilderdi damytý men qoldanýdyń 2011-2020 jyldarǵa arnalǵan memlekettik baǵdarlamasyn iske asyrý aıasynda ázirlep otyr. Ondaǵy maqsat - memlekettik tapsyryspen, jańa tehnologııalarǵa saı shyǵarylǵan mýltfılmder jınaǵyn kópshilikke tanystyrý, qazaq tilin úıretýge arnalǵan kómekshi-ádistemelik qural retinde mektepke deıingi bilim berý mekemelerin qamtamasyz etý. Qazaq halyq ertegileriniń jelisi boıynsha túsirilgen 40 serııaly mýltfılmder jınaǵy «Balalarǵa arnalǵan qazaq tili» atty anımatsııalyq bilim berý jobasy boıynsha shyǵarylǵan.

"Bul joba búldirshinderge ertegi arqyly til úıretýdiń jeńil ári oınaqy tásiline negizdelgen. Balalardyń jas ereksheligine saı anımatsııalyq, mýltıplıkatsııalyq kórinister olardyń til úırenýge degen qyzyǵýshylyǵyn arttyryp, este saqtaý qabiletin damytady. Balalar estý, kórý, qaıtalaý arqyly sózderdi durys aıtýǵa jattyǵady. Zamanaýı tehnologııanyń sońǵy jetistikterine súıene otyryp, 3D-formatta túsirilgen mýltfılmder balalardyń til úırenýge degen qyzyǵýshylyǵyn damytýǵa, tanymyn, qabiletin arttyrýǵa zor septigin tıgizedi", - deıdi basqarma mamany Qymbat Nursultanqyzy. Onyń aıtýynsha, bul jınaqqa «Aldar Kóseniń kóńildi oqıǵalary» atty 85 serııaly mýltfılm, álem halyqtary ertegileriniń jelisi boıynsha túsirilgen 50 slaıd-shoý ertegi, «Bizdi qorshaǵan álem» atty 1000 sózdi qamtıtyn oryssha-qazaqsha sýretti aýdıo-sózdik engizilgen. Anımatsııalyq mýltfılmder jınaǵyn jaryqqa shyǵarýdaǵy maqsat - mektepke deıingi mekemelerde qazaq tilindegi qarym-qatynastyq orta qalyptastyrý, kommýnıkatıvtik-tildik keńistiktegi qazaq tiliniń qoldanylýy aıasyn keńeıtý. Jańa ınnovatsııalyq tehnologııalardy tıimdi paıdalaný arqyly ózge ult ókilderiniń balalaryna qazaq tilin úıretý sapasyn arttyrý, til úırený daǵdylaryn damytý.